كود سبور//

اعتبر عبد السلام بلقشور رئيس العصبة الوطنية لكرة القدم الاحترافية، أن كل ما كايروج حول محاربتو للوداد الرياضي ما كاينش وهي ادعاءات غير صحيحة واعترف أن العلاقة ما بينو بين الوداديين ولات ماشي هي هاديك من بعد رحيل الرئيس الأسبق سعيد الناصيري، وأكد رئيس العصبة أنه كان ديما واقف مع الوداد أيام الناصيري سوا ملي كان نائب له فالعصبة، أو ملي دخل النادي مرحلة صعبة بعد الرحيل ديالو، وأنه تحمل مسؤولية عقد 4 جموع عامة للنادي في وقت واحد، وقلب لها هو الرئيس السابق عبد المجيد البرناكي على صيغ قانونية باش تكون الأمور مضبوطة قانونيا، وحتى على التدوينات اللي كاينشر على مواقع التواصل الاجتماعي، اعتبر بلقشور أنها ماشي كلاشات للوداد ولا للجمهور الودادي، وما عندها بهم علاقة ولكن فقط هو مهتم بالماء وعزيز عليه الزجل وأنه زجال.

وبخصص جمهور الوداد اللي كايتشكاو من أنه كانت برمجة ضاغطة على الفريق خلال السنوات الماضية ملي كان كايشارك فشومبيونزليگ عكس الفرق الأخرى اللي مشاركين هذا الموسم كايلعبو براحة، قال عبد السلام بلقشور خلال المرور ديالو مع قناة الرياضية: “ملي بدينا هذا الموسم وحنا مستحضرين تاريخ 15 او 16 ماي من أجل فريق الوداد الرياضي، وملي كانقوليك هذا التاريخ يعني أننا نقصنا شهر ونص من الزمن المخصص للبرمجة باش نعطيو للوداد فرصة يوجد لكاس العالم للأندية حيث ما يمكنش نساليو البطولة فـ30 ماي وتقولو له سير شارك فكأس العالم فبداية يونيو وهذا الشي ضغط علينا، وما نساوش الوداد فاش كانوا مشاركين فالسوبرليگ الموسم الماضي وقفنا البطولة حتى جاو الوداد وتلقينا انتقادات كبيرة من المدربين اللي كان كيقولو لينا علاش غانبقاو نتسناو الوداد حتى تجي وحنا وقفنا البطولة كلها حتى جاو الوداد وملي كاتكون مصلحة الأندية خارجيا كانوقفو مع مصلحة الأندية، ما يمكنش لينا نكيلو بمكيالين او نوقفو على مسافات مختلفة ما بين نادي ونادي”.

ووضح عبد السلام بلقشور: “ديما كنت في علاقة طيبة مع الوداد ملي كان سعيد الناصيري رئيس النادي وكنت نائب ديالو في العصبة الوطنية الاحترافية، وما كان حتى شي مشكل ولكن في هذه النسخة الأخيرة كانت مغايرة علما أنني قدمت شخصيا وباسم العصبة الكثير لفريق الوداد في محنته من بعد رحيل سعيد الناصري الله يفك سراحو ويدير له تاويل ديال الخير ونتمناوه يكون بريء ويرجع لأحضان كرة القدم الوطنية، ومن بعد هاديك المحنة. أول من تحمل المسؤولية ومشى للجمع العام ودوز 4 جموع عامة وتحمل وزرها القانوني والإداري والوضع ديال الوداد هو أنا، ومشيت حيت اعتبرنا أن الوداد إرث وطني ويجب الحفاظ على مكتسباته وكيانه وهياكله وأن يبقى كبيرا وعظيما وقلناها علنا وما كانخبيهاش، وكانعتابرو الوداد والرجاء والجيش الملكي والمغرب الفاسي مكتسبات ديال الوطن وخاصنا نحافظو عليهم، مشيت واشتغلت ليالي مع الرئيس السابق عبد المجيد البرناكي آنذاك باش نلقاو الصيغ القانونية ومع مستشارين قانونيين باش ما يكونش عندنا حتى شي طعن من أي جهات ولو خارجية باش يبقى الوداد قوي فهاديك المرحلة اللي كانت عصيبة جدا”.

وكشف رئيس العصبة الاحترافية: “البرناكي كان محتاج لواحد مبلغ مالي باش يتفاوض مع اللاعبين حمدو الهوني وإلياس الشتي ودراوي اللي كانوا كايطالبو بكثر من 2 ديال المليار وتحياتي لهادوك اللاعبين حيث ما طلبوش شي حاجة كثيرة باش يفسخو العقود ديالهم مع الوداد بالتراضي وهادي هي الحكمة  ديال المسير ملي يفسخ بالتراضي حيث كون مشاو هاد اللاعبين للنزاعات كانوا غاياخدو كثر من 2 ديال المليار، وعطينا للوداد تسبيق حيث كنا حبسنا لفلوس ديالهم بسبب أنهم ما داروش جموع عامة، وهذا المبلغ اللي عطيناهم راه عطيناه لهم من فلوسهم ماشي من مالية اخرى، ولا علاقة لها لا بترتيب ولا بدعم ولا حتى حاجة، عطينا للوداد من فلوسها، ربما الحاجة اللي تجاوز وفي إطار دعم الوداد هي أنني تحملت المسؤولية أن هذاك الفيرمون يدوز فالكونط ديال الوداد فرع الباسكيط، وهذا الشي كون كانت ضد الوداد غانقولهم ما يمكنش يدوز فالكونط ديال الباسكيط ونحبس هاديك العملية ولست مجبرا نعطيو هذاك التسبيق عطفا على الوداد”.

وبالنسبة للتدوينات اللي كاينشر بلقشور وكايقولو أنه كايكلاشي بها الوداديين، جاوب بلقشور وقال: “التدوينات ديالي يريد لها أن تقرا على أنها تمس الوداد وأنا ما يمكنش ليا نهاجم الوداد ولا جمهورهم ولو غلط فحقي وأنا ماكنقول ديما جمهور الوداد فوق راسي وجمهور كبير وفيه مثقفين شرفو المغرب ونفس الشي بالنسبة لجمهور الرجا والمغرب الفاسي وغيرهم، وأنا في مجال كرة القدم إلا باش نكون مع الجمهور ونمشي فالاتجاه ديالهم وماشي نعاكسهم سي نو حتى أنا نمشي نبدا نكلاشي وهذا ما غايخلينيش نكون مسؤول ناجح، أنا فهاديك الباج ديال فيسبوك كانشر على التساقطات المطرية حيث أنا منتج فلاحي ومهتم بقضايا الماء من صغري ودرت أبحاث في مجال الماء وباحث فيه، بالإضافة إلى ميولاتي الفنية وراني كتبت زجل كثير لمجموعات غنائية مناضلة، أعشق الأغنية الثورية وهذا هو الجانب الآخر ديال عبد السلام بلقشور”.