كود – إسبانيا//

وافق المجلس الجماعي ديال بلدية نيجار إقليم الميريا اليوم الخميس على مقترح جا به فريق Vox، ووافقو عليه حتى الحزب الشعبي، باش يتنظّم دخول المرافق تابعة البلدية فالحالات اللي كيكون فيها الوجه مغطي بشكل كامل.

القرار كيقول بلي أي واحد باغي يدخل للإدارات أو المصالح البلدية، خاصّو يبيّن وجهو فالحالات اللي فيها التحقق من الهوية ضروري، بحال الإجراءات الإدارية اللي فيها معطيات شخصية أو قرارات قانونية، وذلك، باش يتفاداو التزوير وانتحال الشخصية، وباش يحميو الناس والممتلكات.

هاد القرار جا فواحد الوقت اللي فيه النقاش على النقاب والبرقع لي ولى حاضر بقوة فالساحة السياسية فإسبانيا. هاد الأسبوع،Vox  قدّمت مقترح قانون فالبرلمان (Congreso de los Diputados) باش تمنع النقاب والبرقع فالأماكن العمومية وحتى فبعض الفضاءات الخاصة اللي عندها طابع عمومي.

فنفس السياق الحركة النسوية فـ مدريد غادي تنظم مسيرة نهار 8 مارس، بالتزامات مع اليوم العالمي للمرأة، وهاد المرة غادي تكون ضد جميع أشكال الحجاب اللي كتلبسو المرأة، واللي وصفوه بـ”راية الخضوع”.

المسيرة غادي تبدا مع 12 ديال النهار تحت شعار: “ضد الهمجية الأبوية، نسوية أممية: لا محجبات، لا مستغلات، لا بائعات هوى”. وكيقولو باللي الحجاب بجميع أشكالو كيرمز للاستعباد وكيمنع المرأة تتحكم فجسدها وحياتها.