الوالي الزاز -كود- العيون///

[email protected]

قالت مصادر تابعة لجبهة البوليساريو، إن البرلمان الإقليمي ديال إميليا رومانيا، صادق على قرار كيدعم فيه جبهة البوليساريو ويروج لها مستقبلا.

هاد القرار كينص على تنظيم تظاهرة سنوية تدعم جبهة البوليساريو وأطروحتها هي والجزائر من نزاع الصحراء، هادشي بالإضافة لمجموعة من الأنشطة لي ديجا كديرهم هاد البلدية على غرار استقبال “أطفال عطل السلام”، واتفاقيات ديال توأمات دايراها مع ما يسمى “ولايات ودوائر” فمخيمات تندوف.

دابا واش حنا ما عندنا مسؤول ما عندنا سفارة ما عندنا سفير يوقف هاد العبث وهاد التخربيق ويدير خدمتو، كيفاش سفارة على گدها عاجزة على أنها توقف تغلغل البوليساريو فالمشهد السياسي فإيطاليا، اليوم بلدية وغدا برلمان إقليمي وبعدو حزب سياسي ومن بعد الحكومة الإيطالية.

كلشي عارف شكون مور هادشي، عارفين بأن الجزائر لاعبة دور وخدامة من أجل البوليساريو بسباب العلاقات القوية مع إيطاليا ومصالح إيطاليا معاها خاصة فمجال الطاقة، ولكن راه ما يمكنش سفارتنا فروما تنعس وتهز الراية البيضاء وتقول صافي، راه خاص خدمة وخدمة كبيرة، لاسيما على مستوى الأحزاب السياسية وهاد البرلمانات الإقليمية باش تعزز الوحدة الترابية للمملكة المغربية وسيادتها على الصحرا فإيطاليا.

خاص بنادم يدير خدمتو ويجيب شراكات لمدن الصحرا بحال لي بين الداخلة وكروتوني، وخاص ترويج واستهداف للفعاليات المدنية فإيميليا رومانيا وتنظيم زيارات للصحرا باش توقف هاد الفعاليات على المجهود لي كيبذلو المغرب فأقاليمو الجنوبية ونكذبو هاديك المغالطات لي كتروج عندهم، وهادي خدمة السفير ماشي شي حد آخر.