كود سبور//

فاقو بلجيكا فكاس أوروبا “ألمانيا2024”، بعد بدايتهم الكارثية بالخسارة فالجولة الاولى من دور المجموعات مع سلوفاكيا، قدرو يصصحو الوضع وربحو اليوم السبت منتخب رومانيا برسم الجولة الثانية.

الماتش اللي حضرو ملك بلجيكا فليب، قدرو البلجيكيين يربحو فيه رومانيا بنتيجة 2 لزيرو، وماركا لهم الهدفين بجوج كل من يوري تيليمانس فالدقيقة 2، وكيفن دي بروين فالدقيقة 80، مع العلم ان لوكاگو ماركا لهم هدف وما تحسبش بداعي التسلسل.

وبهذا الرباح خداو بلجيكا أول 3 نقاط فالبطولة، خلاتهم يتعادلو فالنقاط مع گاع المنافسين فالگروب 5، رومانيا وسلوفاكيا واوكرانيا بـ3 نقاط لكل منتخب، وتأجل الحسم فالمتأهلين إلى ثمن النهائي حتى الجولة الثالثة والأخيرة من دور المجموعات.