كود – وكالات //

فبلجيكا، فصلات مقاطعة فلاندرز الشرقية المعلمة هاديا أماجود من الخدمة، بعدما رفضات تحيد الحجاب الإسلامي ديالها فالخدمة.

المعلمة أكدات لوكالة الأنباء البلجيكية «بلغا» أنها خسرات خدمتها من بعد ما تشبثات بلباس الحجاب.

هاديا كانت خدامة من شتنبر 2022 فمدرسة ابتدائية مخصصة للأطفال من ذوي الاحتياجات الخاصة فمدينة أسينيدي، وكانت كتخدم بالتعليم الإقليمي وكتهضر بالهولندية مزيان.

المعلمة كانت كتلبس الحجاب من نهار بدات خدمتها، ولكن فـ27 يونيو 2024 تبدلات القوانين الداخلية ديال موظفي المقاطعة، وابتداءً من فاتح شتنبر من نفس العام، ولى ممنوع على الموظفين يلبسو الرموز الدينية أو الفلسفية ، باستثناء الأساتذة ديال مادة الفلسفة.

أماجود كتعتبر أن القضية ماشي غير مرتبطة بالحجاب، ولكن كتطرح سؤال أكبر على الحدود ديال السلطة ففرض قيود على الحريات الشخصية ديال الموظفين. وكتسول: «لأي حد يقدر المشغل ينير الحريات الشخصية ديال المعلم؟»، واعتبرت أن التفسير اللي عطاتو السلطات المحلية لمبدأ الحياد عندو طابع سياسي.

القضية سبق ليها دازت من مسار تأديبي ،حيث فماي 2024، بدات السلطات المحلية إجراءات ضد المعلمة بسبب الحجاب، ولكن لجنة التأديب وصات بإغلاق الملف، بعدما تبين أن القانون المهني اللي كان  فداك الوقت ما كينطبقش عليها، وما كانش أساس قانوني كافي لاتخاذ عقوبة تأديبية ضدها.

وفـ أكتوبر 2024، سالات المقاطعة هاد الإجراءات بلا ما تفرض عليها أي عقوبة،وخا هادشي، وصلات القضية دابا للفصل من الخدمة.

هاديا أماجود من جهتها قالت بلي ما خسراتشةغير الخدمة، ولكن حتى الدخل ديالها والأمان والاستقرار اللي كانت كتتمتع بيه فالمهنة، بعدما كانت عندها وظيفة دايمة.