أنس العمري – كود///

“بلبن” ولا داير مشكلة أمنية كبيرة فالمعاريف. فصباح اليوم الأربعاء، بالقرب من هاد المحل بالدار البيضاء جرى تسخير 8 عناصر من شرطة المرور وسيارة للشرطة باش يوقفوا على عدم تجدد الفوضى التنظيمية لي كتوقع قدام هاد الفضاء التجاري نتيجة تقاطر أفواج غفيرة من الناس لي باغيين يقتنيو منتجات هاد الماركة المصرية.

وجند هاد العدد ديال البوليس لتنظيم وتيسير حركة المرور بشارع القاضي إلياس، لي وللا من الصعب عبوره أو المرور في جنباته، وذلك بعدما تجددت الفوضى، البارح الثلاثاء، أمام المحل، ما اضطر السلطات إلى إغلاقه في وقت مبكر.

وهادي ماشي أول مرة. فبسبب “بلبن” وللا الشارع كيشهد يوميا تجمع أعداد كبيرة من المواطنين في طوابير تمتد من أمام المحل وجنباته حتى لوسط الشارع. وهاد الروينة كيضطر معها الأمن إلى تسخير، في كل مرة، أكثر من 4 رجال شرطة مرور باش يوضعوا ليها حد، وهو ما يشكل عبء إضافي ليها فالوقت لي كنعرفوا أن شوارع كازا فحاجة لشرطيي المرور لتخفيف حالة الزحام لي كتعرفها شوارعها يوميا، خصوصا في أوقات الذروة.

يذكر أن هاد المشهد يتكرر يوميا، منذ أن فتح المحل أبوابه بالمعاريف، حيث ما كتلقى السلطات ما دير سوى أنها تسد ليه مؤقتا باش توقف روينة لي كتوقع وشوية كترجع تسمح ليه يتسأنف نشاطه. وهاد عملية سد حل هي الحل الوحيد لي لقاو حتى لدابا في مواجهة ورطة الترخيص لممارسة هذا النشاط التجاري فواحد من أهم شوارع الحي، لي تشقلب حالو ملي تحل فيه “بلبن”.