أنس العمري-كود///
“بلبن” كيكذبو على السلطة. ففي الوقت لي تعلن أن لجنة مختلطة من عمالة كازا- آنفا قررت توقيف نشاط محل هذه الماركة المصرية في حي المعاريف لعدم توفره على معايير الصحة والنظافة وإجراءات الأمن والسلامة، خرج مستخدم من “بلبن” نفى هاد الخبار.
ووصف، فتصريح لوسيلة إعلام وطنية إلكترونية، أن توقيف نشاط المحل غير إشاعة، مبرزا أنه “ما عندهم حتى شي قرار صادر على عمالة آنفا باش نسدو المحل”.
وأضاف “حنا كشركة “بلبن” كنسدو المحل على ود سلامة الناس وكنتعاونو مع السلطات لأننا كنشوفو واحد التجمهر بشكل يومي”، ليزيد موضحا “كنديرو هادشي حفاظا على سلامة الناس”.
دابا بتصنيف هاد الخبر في خانة “الإشاعة”، كيولي مشكل “بلبن” مرشح ياخود بعد أخور.
حينت القرار لي تكال إنه “إشاعة” راه رسمي، ومعلن عنه من مصدر فالسلطة المحلية. وهاد المصدر أكد، لـ”كود”، أنه تقرر يتغلق المحل مؤقتا حتى يقادو ماليه أمورهم.
وجا القرار بعدما أعدت اللجنة تقرير إثر زيارة قامت بها للمحل، أمس الثلاثاء، يضيف المصدر نفسه. وذكر أنه تم إتلاف مائة كيلوغرام من منتجات حليبية ما معروفش مصدرها، مضيفا أن هاد المنتجات ما عندهاش التراخيص الصحية اللازمة لي كتعطيها “أونسا”.
