أميمة عطية – كود كازا ///

رجع عمر بلافريج من جديد للمشهد السياسي، ولكن هاد المرة ماشي باش يترشح ولا عبر مسؤولية حزبية جديدة، وإنما من خلال دعم لائحة شبابية داخلة غمار الانتخابات التشريعية بدائرة تيفلت ـ الخميسات.

العودة ديال بلافريج كتجي فواحد التوقيت اللي اليسار داخل الانتخابات بتحالف انتخابي بين فيدرالية اليسار الديمقراطي والحزب الاشتراكي الموحد، واللائحة اللي كيدعمها فتيفلت ولي كيترأسها الشاب حمزة بولحديد، مع المستشار الجماعي عز العرب حلمي عن نفس التحالف.

بلافريج، اللي سبق ليه كان نائب برلماني عن دائرة الرباط فانتخابات 2016 باسم فيدرالية اليسار الديمقراطي، ووصل حتى لرئاسة لجنة المالية والتنمية الاقتصادية بمجلس النواب، كان اختار فـ2021 ينساحب من البرلمان ويعتزل العمل السياسي الرسمي.

وكان جا ، قرار الانسحاب ديالو فداك الوقت ، حسب التصريحات اللي سبق ليه أدلى بها، بمجموعة من الأسباب، من بينها عدم نجاح تجربة بناء حزب يساري ديمقراطي قوي، بحيت كان وصف فداك لوقت سياسية بـ“الجو السياسي القاتم”.

ومن بعد سنوات من الغياب على المؤسسات الحزبية، بلافريج بقى حاضر فالنقاش العام من بعيد، ومن بين آخر المحطات اللي بان فيها مشاركتو فبودكاست موجه لـ“جيل زد” عبر منصة “ديسكورد” فـأكتوبر 2025، فين هضر على الدور اللي يقدر يلعبو الشباب فالتغيير.

واليوم، رجوعو لدعم لائحة شبابية فالانتخابات التشريعية كيعاود يطرح اسم بلافريج فالمشهد، خصوصا وأن تحالف اليسار داخل هاد الاستحقاقات ببرنامج كيحط الشباب والكرامة والعدالة الاجتماعية ضمن أبرز المحاور ديالو.

ولكن هاد الظهور الجديد ما كيعنيش، حسب المعطيات لمتداولة، أن بلافريج رجع رسميا للعمل الحزبي أو أنه غادي يتحمل مسؤولية تنظيمية داخل الحزب، وإنما كيبقى حضورو مرتبطا بدعم اللائحة الشبابية فتيفلت ـ الخميسات.