كود كازا //

المكتب المغربي لحقوق المؤلف والحقوق المجاورة خرج ببلاغ كيصحّح فيه بزاف ديال المغالطات اللي نشرو بعض الصفحات والمواقع بخصوص الدور ديالو فجمع مستحقات الفنانين. المكتب كيأكّد باللي هو جهاز رسمي ديال الدولة، مخوّل قانونياً باش يحمي حقوق المؤلفين ويستغلّها ويوزّع المداخيل ديالها، وهادشي كيجي بناءً على القانون 2.00 و25.19 اللي كيعطيوه الاختصاص المباشر فتدبير هاد الحقوق.

البلاغ تيقول أن المكتب كيجمّع المستحقات من المؤسسات اللي كتستغل الأغاني والأعمال الفنية فالمقاهي، المطاعم، الفنادق، القاعات الرياضية، السينما، المهرجانات وغيرهم، وفق جداول رسمية منشورة فالجريدة الرسمية، وكيشدّد باللي هاد الأداء ماشي لا غرامة ولا ضريبة، ولكن حق مالي للمؤلفين والفنانين ملي كيتم نقل أعمالهم للجمهور عبر التلفاز ولا الراديو ولا أي وسيلة كتبلّغ للعموم.

وكيزيد البلاغ كيأكد ان الأعوان ديال BMDA محلفين ومخوّلين قانونياً يديرو المعاينات، يحررو المحاضر، وحتى يحجزو الأجهزة اللي كتستعمل فاستغلال غير قانوني للأعمال المحمية. والمكتب كيذكّر باللي استخلاص الحقوق ماشي حاجة جديدة، بل كيتم فالمغرب منذ 1943، وهاد النظام متوافق مع الاتفاقيات الدولية اللي المغرب موقّع عليها، وكيستافدو منو الفنانين المغاربة والأجانب.

وفالختام تيقول البلاغ ان المؤسسات اللي ما كتلّتزمش بطلب الرخصة وكتrefuser تخلص المستحقات، المكتب كيحاول يسوّي معاها ودّياً، لكن فحال الإصرار على الرفض كيتم اللجوء للقضاء، وغالباً الأحكام كتكون فصالح المكتب. وكيأكّد أخيراً أن حقوق المؤلف كيبقى يستفد منها الفنان طول حياتو، وورثتو حتى لـ70 عام من بعد، قبل ما يدخل العمل للملك العام.