گود سبور//

واصل السويسري جوزيف بلاتر الرئيس الأسبق للاتحاد الدولي لكرة القدم، المطالبة بالتغيير فرئاسة الفيفا، اللي شادها المواطن ديالو جياني إنفانتينو، وطالب بتولي امرأة الرئاسة.

وخرج جوزيف بلاتر بتغريدة جديدة على الحساب ديالو فتطبيق “X” ونوه بموقف رئيسة الاتحاد النرويجي لكرة القدم ليس كلافينيس اللي هي من أقوى المعارضين لجياني إنفانتينو والسياسة ديالو فرئاسة الفيفا: وقال: “كاتستاهل ليز كلافينيس كل الاحترام، كانت الوحيدة اللي دارت موقف واضح وثابت، وما تبعتش الموجة، والفيفا جا الوقت فين تاخد المرأة زمام الأمور”.

وفحالة طلعت امرأة لرئاسة الاتحاد الدولي لكرة القدم، غادي تكون سابقة فهاد البوسط حيث عمر شي امرأة شدات رئاسة الفيفا ملي تأسست عام 1904، وأعلى منصب وصلت له المرأة، كان الأمانة العامة من خلال السنغالية فاطمة سامورا.

ونايض النحل على جياني إنفانتينو الرئيس الحالي للفيفا، وخصوصا من ورا مشروع تحويل كاس العالم إلى شركة رياضية وبيع أسهمها لمستثمرين اللي كان ناوي يدير، قبل ما يتراجع عليه بضغوط قوية من الاتحادات القارية وخصوصا الاتحاد الأوروبي، ودابا الاتحادات الوطنية التابعة للأخير كاتسحب من انفانتينو الثقة باش يترشح لولاية رئاسية جديدة، مع العلم أن الانتخابات الرئاسية غادي تكون يوم 18 مارس 2027 فالرباط.