كود – أغينزيا نوفا //

ألمانيا كتدعم مشروع “سيلا أتلانتيك” اللي الهدف ديالو هو يصدر  الضو  التقي من المغرب حتى لألمانيا، ب كابل بحري طويل  كيوصل تقريباً لـ 4800 كيلومتر.

حسب وكالة “أغينزيا نوفا” الإيطالية، الحكومة الألمانية علنات على دعمها الرسمي لهاذ المشروع، وهاد الشي جا بعد ردود فعل إيجابية من وزارة الاقتصاد والطاقة الألمانية، ومن شركات كبار فـ ألمانيا، رومان دودنهاوزن، واحد من المسؤولين على المشروع، قال بلي الفريق ديالهم دابا داخل فمفاوضات مع الحكومة المغربية باش يتفعل الربط الكهربائي بين المغرب وألمانيا.

المشروع ما بقاش غير فالإطار الحكومي، ولكن حتى فاعلين صناعيين كبار فـ ألمانيا بداو كيبينو اهتمامهم، من بينهم شركة “دوتش باهن” اللي كتشرف على السكات ديال التران ، واللي عبرات على الاستعداد ديالها باش تستعمل ضو اللي غادي يتنتج فالمغرب.

هاد الشركة حتى هي رسلات رسالة لوزارة الاقتصاد والطاقة الألمانية، رحبات فيها بالدعم الحكومي للمشروع، واعتبرات بلي الضو  الجاي من المغرب، من الطاقة الشمسية وطاقة الرياح، اختيار دايم وذكي، وقادر يعاون ألمانيا ف الطلب الكبير على الطاقة النقية.

وحسب نفس المصدر، غادي يتدارو فالمغرب محطات ديال الطاقة الشمسية وطاقة الرياح بقدرة إجمالية توصل حتى لـ 15 جيغاواط، ومع مخطط باش يتصدر تال 26 تيراواط من الكهرباء فالسنة لألمانيا، وهي كمية كتمثل تقريباً 5% من مجموع الاستهلاك الكهربائي ديال ألمانيا.