الرئيسية > آش واقع > بقرار من العمالة.. الحوانت والمحلات التجارية فأحياء فمراكش غتولي تسد مع 9
27/07/2020 19:50 آش واقع

بقرار من العمالة.. الحوانت والمحلات التجارية فأحياء فمراكش غتولي تسد مع 9

بقرار من العمالة.. الحوانت والمحلات التجارية فأحياء فمراكش غتولي تسد مع 9

عفراء علوي محمدي- كود//

رجعات الداخلية كتزير مع القهاوي والريسطورات والمحلات التجارية من جديد، بحيث حتى بعض الأحياء فمراكش غايوليو المحلات التجارية فيها يسدو بكري، وخصوصا فمنطقة الحي الحسني اللي كتعرف رواج تجاري كبير.

دابا المحلات فهذ البلاصة غيوليو يتسدو كاملين مع التسعود حسب قرار جاي من العمالة، وغادي يتمنعو كَاع الأنشطة التجارية فهذ الوقت، واللي مابغاش يسد محلو ويجمع السلعة ديالو غيتم إغلاق محلو فالبلاصة ومصادرة البضائع ديالو المعروضة فالشارع، بلا ما نتكلمو على المتابعات القانونية الأخرى اللي كتسناه.

وهذ القرار، اللي تخاذ لبارح، واللي حصلات “كود” على نسخة منو، جا من بعد ما عمالة مراكش عاينات “المخاطر الكبيرة” اللي كيشكلها توافد آلاف المواطنين على هذ المنطقة، وتحديدا شارع الدخلة وزنقة البراعم وشارع الورود وشارع العندليب طيلة الليل للتسوق، وهذشي غيساهم فانتشار فيروس كورونا المستجد، بحكم أن بزاف مكيستعملوش وسائل الوقاية ومكيحترموش التباعد الاجتماعي ومالابسينش الكمايم.

وحتى السلطات ففاس خدات قرار مشابه، غيلزم على صحاب القهاوي والريسطورات يسدو قبل ال8 ديال العشية، وممكن قررات من هذ القبيل غدي تشمل مدن واحياء أخرى، فالمناطق اللي كتعرف انتشار ديال الفيروس.

موضوعات أخرى

09/08/2020 18:30

تفاصيل “كورونا” بالجهات: جهة مراكش اللولة بـ7 حالات لكل 100 ألف نسمة.. و116 حالة خطيرة منها 46 مغربي ومغربية بين الحياة والموت