گود سبور//

مازال الدولي المغربي سفيان أمرابط ما قادرش يلعب، وهذا الشي قبل 2 سيمانات من كاس افريقيا “المغرب2025” اللي غادي تبدا يوم 21 ديسمبر 2025.

وعكس جريدة “موندو ديبورتيفو” الإسبانية اللي قالت ان سفيان أمرابط راه برا من الاصابة، وتدرب مع ريال بتيس باش يلعب ضد البارصا غدا السبت ضمن منافسات بطولة الصبليون، كشف الشيلي مانويل بيليگريني مدرب ريال بتيس، اليوم الجمعة فـ الندوة الصحافية قبل الماتش ضد البارصا، ان سفيان أمرابط ما غاديش يلعب هذا الماتش حيث باقي ما واجدش بسبب الاصابة اللي كان تعرض لها ماي تصاطح مع ايسكو.

وما بقى والو لكاس افريقيا غير 2 سيمانات، والجماهير المغربية مبرزطين بزاف مع الإصابات اللي تقدر توقع للاعبين المنتخب الوطني المغربي، ومنهم سفيان أمرابط اللي عنصر أساسي فـ تشكيلة وليد الرگراگي، وبالمقابل فـ اشرف حكيمي راه بدا كايتريني والحالة ديالو تحسنت بزاف، ونايف أگرد رجع يلعب.