گود سبور//

كايعيش فريق الوداد الرياضي وضع صعيب بزاف بسبب العشوائية ديال رئيس الجمعية الرياضية للنادي هشام آيت منا، اللي غادي وكايغرق النادي، وبعد الموسم الماضي الكارثي اللي ما قدرش الواك ينافس فيه على حتى شي لقب وختمها بمشاركة كارثية فمونديال الأندية فالميريكان، فالفريق واحل دابا فعدد من اللاعبين اللي ما لقاش آيت منا حل معهم باش يمشيو بحالهم.

وكشفت مصادر “گود” أنه كاين عصيان داخل الوداد الرياضي، بقيادة 6 لاعبين واللي رافضين يبقاو فالحمرا وفنفس الوقت باغيين المستحقات ديالهم، ومقابل هذا الشي آيت منا رئيس الجمعية الرياضية ما قادر يدير معهم حتى شي حل باش يفك معهم الجرة.

وحسب نفس المصادر فمن بين هذه العناصر اللي علنات العصيان على هشام آيت منا الگول مهدي بنعبيد اللي باغي يمشي بحالو وهاذ الشي كايفسر الغياب ديالو البارح الاحد فالماتش أميكال اللي لعبوه الوداد ضد فريق الراسينگ البيضاوي، واللي حبس فيه عبد العالي المحمدي اللي رجع من الإعارة، ونفس الأمر بالنسبة للگول يوسف المطيع اللي حتى هو باغي يمشي بحالو، ومن بين العناصر اللي أعلنت العصيان على ولد فضالة، كاين فهد موفي، وجمال حركاس، وعبد المنعم بوطويل، وهادو كاملين باغيين يفكو الجرة مع الوداد ويقلبو على ريوسهم فبلايص اخرين ولكن هشام آيت منا ما قادرش يعطيهم مستحقاتهم ويلقى معهم حلول بالتراضي وكل واحد يشد طريق.

رئيس الجمعية الرياضية للوداد الرياضي هشام آيت منا بان تاني صغيور وضعيف، وحادگ غير فالكلاشات الخاوية باش يغطي على التسيير العشوائي اللي داير فالوداد واللي كمل فيها عام من التدبير الفاشل والتعربيز، وفبلاصة ما يلقى حلول للمشاكل اللي ورط فيها الوداد، باقي وفي للعادة ديالو ملي كان رئيس لشباب المحمدية، وهي يكلاشي الرجاويين باش يتعاطفو معه الوداديين، وبقات فالحمامة والسوينگ، اللي قدم بهم اللاعب الجديد عبد الغفور لميرات اللي أصلا لاعب متوسط جدا وراس مالو هدف ماركاه على الراجا فماتش أولمبيك آسفي الموسم الماضي، مع العلم أن الرجا تراجعو على التوقيع معه وخالاوه كايتسنى فلاكاديمي فبوسكورة، حيث اللاعب بالغ فالشروط ديالو بعدما اتفقو معه من قبل، وهو يقرر بيرواين رئيس الرجا السابق يخليه يتسنى فلاكاديمي ومشى دار اجتماع مع المنخرطين، وطبعا ايت منا باش يبان قافز مشى عيط للاعب وسنا معه، ومقدمو وهو كايقطع زعما فالكونطرا ديال الرجا، وهاذ الشي كايلخص عقلية رئيس نادي هاوي الدف ديالو هو يبان ويتصور بالخوا الخاوي ويزيد فأسباب الشغب والاحتقان بين الجمهور اللي الدولة كاتحارب فيها.

وباش نبقاو فالوداد الرياضي، فالنادي كايعيش دابا أزمة تسيير كبيرة وخانقة، والمكتب المديري ديال النادي ضعيف بزاف وكلو عامر بالانتهازيين وأصحاب المصلحة، وفبلاصة ما ينوضو لآيت منا ويعتقو الفريق راه ضاربين الطم وساكتين، وحادگين غير فالسياحة والسفريات بحال فمونديال الأندية فميريكان ملي داهم يحوصو على حساب  الوداد، وأغلبهم مشى بفلوس الحمرا وخداو مصروف يومي من الوداد كايوصل لـ6000 درهم يوميا للواحد واخا هما ماشي شي وحدين اللي مخصوصين، ودابا راه طامعين تاني فالسفر مع الوداد لقطر على قبل كاس الأحرار اللي لاعبين فيه ضد السد القطري يوم 10 غشت، والمصيبة هي أن الوداد هو اللي خاسر فهاد الشي حيث اللاعبين اللي ما غايفكش معهم ايت منا الجرة القانون فمصلحتهم من غير المشكل ديال دوسي الوضعية المالية للنادي اللي ما رسلوش للعصبة الاحترافية فالوقت واللي كايهدد الفريق بالمنع من الانتدابات، وأعضاء المكتب راه ضاربينها بسكتة والرئيس گالس عاطيها للكلاشات الخاوية باش يغطي على فضايحو فالوداد، وهاد العشوائية ديال ولد فضالة راه مخليا الوداديين ديما عندهم أمل أن سعيد الناصيري رئيس الشركة الرياضية للوداد الرياضي يخرج براءة من قضية “إسكوبار الصحرا” ويتفرج عليه من الحبس ويرجع يشد النادي باش يعتقو من الفشل اللي غرقو فيه آيت منا ومن الانتهازيين اللي فالمكتب المديري حيث هو اللي قدر يحقق النجاحات الكبيرة فتاريخ الوداد اللي شبه مستحيل يقد يحققها حاليا شي رئيس آخر.