كود – وكالات //

فواحد الاكتشاف علمي اللي يقدر يقلب مفاهيم قديمة فـعلم الوراثة، بينات دراسة جديدة منشورة فمجلة Nature Communications باللي تغيير بسيط بزاف فـالحمض النووي يقدر يبدّل تطور الجنين من أنثى لذكر عند الفيران.

الدراسة وضّحات باللي جين سميتو Sox9 هو اللي كيتحكم فواش الجنين غادي يطوّر مبايض ولاخصيتين، فالعادة هاد الجين كيبقى راگد عند الإناث (XX)أو يخدم عند الذكور (XY) وهو لي كيخلي تكوين الخصيتين.

الجديد هو أن العلماء ركّزو على واحد الجزء صغير من ADN ما كينتجش بروتينات، سميتوEnh13، هاد الجزء خدام بحال “بوطنة التحكم”: إلا تبدّل بشكل معيّن، كيقدر يفعّل جين Sox9 حتى عند إناث الفئران.

بعد التجربة النتيجة كانت هي إناث بداو كيطوّرو أعضاء تناسلية ذكرية وخصيتين صغار، وخا أنهم وراثياً إناث، الباحثين وصفو هاد المنطقة بأنها “نقطة حسم”، فين كيتقرّر مصير الجنين بين الذكورة والأنوثة، فواحد التوازن دقيق بزاف.

هاد الاكتشاف ماشي غير مهم للفئران، ولكن حتى لبنادم، حسب الخبراء تقريباً 50% من حالات اضطرابات التطور الجنسي مازال السبب ديالها مجهول، الدراسة كتشير باللي البحث فهاد الأجزاء “المهملة” من ADN يقدر يفتح الباب باش يتفهمو هاد الاضطرابات وتشخص مستقبلاً.

وماشي هادي أول مرة كيبان دورEnh13، حيث دراسات سابقة بيّنات باللي حذف هاد الجزء عند ذكور الفئران كيخليهم يطوّرو أعضاء أنثوية، الشي اللي كيعني أن تغيير الجنس ممكن علمياً فالاتجاهين، حسب كيفاش كيتنظّم هاد الجين.

الحاصول لي كيبان من الدراسة هو أن تبديل حرف واحد فـ ADNيقدر يعاود كتابة “هوية” الجنين كاملة، ويبيّن باللي التفاصيل الصغيرة فالجينات قادرة تصنع أكبر الفروقات.