كود – وكالات//

علنات القيادة العليا ديال بوليس جزر الكناري، البارح الثلاثاء، بلّي البوليس الوطني الإسباني شدّ واحد الراجل سمح ف ولدو القاصر فجزيرة غران كناريا، من بعد ما سافر معاه فالطيّارة وجا به للجزيرة، ومن بعد خلاه تما بلا حتى شي ورقة، وكان باغي يرجع بوحدو للمغرب.

القضية بدات نهار الجمعة اللي فات، ملي مشى واحد الدرّي مغربي قاصر لمكاتب الصليب الأحمر فمدينة تيلدي وطلب المساعدة، الشي اللي خلا الجمعية تعيّط للسلطات دغيا، حيث الحالة ديالو كانت كتبين أنه تعرض للإهمال.

حسب المعلومات اللي كاينة، الدرّي قال بلّي وصل لجزيرة غران كناريا مع باه فالطيّارة لي جاية من المغرب، ولكن من بعد باه خلاه فإسبانيا، وحيًد ليه جميع الوثائق ديالو، وكان ناوي يرجع للمغرب ويخليه تما.

من بعد هاد الشي تدخل البوليس والنيابة العامة اللي كتشرف على قضايا الدراري القاصرين، وتكلفو بالدرّي ودّاوه لمركز ديال الإيواء فجنوب الجزيرة، ومازال دابا تحت الحماية والرعاية اللي كيوفروها ليه المؤسسات المختصة.

التحقيقات بيّنت بلّي الأب وولدو دخلو لإسبانيا نهار 15 دجنبر من مطار غران كناريا. ومني شافو الكاميرات تابعو التحركات ديالو نهار 19 دجنبر، وتشدّ المعني بالأمر فمطار غران كناريا، وهو كيوجد يطلع فطيّارة غادية لمراكش. من بعد ما تشدّ، تحطّ فالحراسة وتدار ليه البحث قبل ما يتقدّم للمحكمة.

المحكمة المختصة فمدينة تيلدي قررات تحطّو فالسجن الاحتياطي، بتهمة التخلي على قاصر، وهي جريمة خطيرة فالقانون الجنائي الإسباني وكتتعاقب بعقوبات قاصحة.

البوليس الإسباني أكد بلّي التدخل السريع والتنسيق بين الجهات ساهم فحماية الدرّي ومنع تعرّضو لوضعية هشاشة خطيرة، وشدّد بلّي هاد النوع ديال القضايا خاصها تزيار حيث كتخلّي آثار نفسية واجتماعية خايبة على الدراري.

 https://www.lavozdelanzarote.com/en/news/events/arrested-for-abandoning-his-son-in-the-canary-islands-and-attempting-to-return-to-morocco-without-the-minor_240204_102.html