وكالات//

مراسلة رياضية في الإكوادور كانت واقفة كدير المراسلة ديالها قدام التيران حتى وقفو عليها جوج فوق الموطور بغاو يكريسيوها، ولحسن الحظ المصور كان مخدم الكاميرا ووثق المشهد صوت وصورة.

الصحافية فانيسا روبلز كانت واقفة ما عليها ما بيها خدامة كتصور حتى وقفو عليهم الشفارة بجوج وهازين المضا، هادشي لي خلاها تطلب من المصور يقلب الكاميرا جهتهم بسرعة.

الشفارة غير شافو الكاميرا غطاو وجههم وهربو، وديك ساعة تبعهم بوليسي بالموطور ديالو.

الفيديو لي كيوثق مباشرة عملية لكريساج داع على مواقع التواصل الاجتماعي في الإكوادور، في الوقت لي نشرات فيه الصحافية القصة لي وقعات على حسابها في الأنستكَرام.

الناس تضامنو بزاف مع الصحافية لي بقات متماسكة ومحافظة على الهدوء ديالها، واخة الموقف لي صعيب، بحكم أن ظاهرة لكريساج في الإكوادور من أخطر ما يمكن الواحد يتعرض ليه.