وكالات//

حكمات محكمة تركية على مراة بالحبس عشر سنين، حيث كانت بغات تنتحر بطريقة غريبة، ولكن ما نجحاتش، ولقات راسها قدام هاد العقوبة اللي ما كانتش متوقعاها.

“بيرغول غول” هاجمات سبيطار ديال الدولة فمدينة “كهرمان مرعش” فجنوب تركيا فشهر أكتوبر لي فات، بجويجة، وهادشي خلق الهلع بين الأطباء والمرضى، قبل ما يسيطر عليها البوليس.

ولكن المفاجأة كانت فالمحكمة، حيث كشفت المراة فالتحقيقات أنها ما كانتش ناوية تضر شي حد، وما كانتش عارفة كيفاش تستعمل السلاح اللي كانت حاملة، وأنها كانت بغات تقتل راسها.

وقالت “غول” أنها كانت فحالة نفسية صعيبة فالفترة اللي دارات فيها الهجوم، حيث خسرت ناس لي كانوا قريبين ليها فالمناطق اللي تدمرات فزلزال 2023، وقررات تقتل راسها بهاد الطريقة، خدات المكحلة ديال ولدها بلا ما تعرف واش فيها ذخيرة ولا لا، وهاجمات السبيطار.