الرئيسية > آراء > بعض المغاربة ماباغين لا يتعاقبو بالحبس ولا الغرامة ولا التصرفيق باغين الدولة تعامل معاهم بحال شي أم مع ولدها المراهق يديرها كحلة زحلة وتسمحليه وتراعيليه
26/03/2020 15:00 آراء

بعض المغاربة ماباغين لا يتعاقبو بالحبس ولا الغرامة ولا التصرفيق باغين الدولة تعامل معاهم بحال شي أم مع ولدها المراهق يديرها كحلة زحلة وتسمحليه وتراعيليه

بعض المغاربة ماباغين لا يتعاقبو بالحبس ولا الغرامة ولا التصرفيق باغين الدولة تعامل معاهم بحال شي أم مع ولدها المراهق يديرها كحلة زحلة وتسمحليه وتراعيليه

محمد سقراط-كود///

واحد فقنيطرة حكمات عليه المحكمة بستة شهور ديال الحبس حيت خرق حظر التجول وفي نفس الوقت واحد لقاوه خارج بالليل واخا كاين حظر التجول وكلى تصرفيقة ومشى نعس فدارهم، الى خيرتي أي مواطن خرق القانون بين العقوبة بتصرفيقة أو ستة شهور ديال الحبس كنظن أن بزاف غادي يقبلو بالتصرفيقة على الحبس، الحبس في المغرب خايب ومن غير خيوبيتو راه كيمشي ليك وقت من حياتك كتدوزو مسدود عليك، بالإظافة حتى ملي كتخرج منو كنتقى منومر عند الناس وموالين الوقت، وصعيب تلقى خدمة محترمة وخاصك تسنى شحال باش تدير رد الإعتبار باش مايبقاش الضوصي عندك موسخ، عاد زيد معاها تكرفيص واليديك في الزيارة والمصاريف الزايدة والتمرميد، عاد تكرفيص ديالك نتا كشخص وشوف واش تزطط راسك أو لا وشنو هي نفسيتك وشخصيتك ووسطك الأجتماعي.

في المقابل كاينة تصرفيقة طبعا مهينة للكرامة وكاين لي الى تصرفق يقدر مايبقاش يجيه النعاس مدة طويلة وينقص التقدير ديالو لذاتو ويقدر يكتائب حيت غادي يحس بالحكرة وبأنه لا عاجز على الدفاع على راسو وكرامتو المهدورة، وكاين لي عندو الأمر عادي حيت فين مكان كيدير شي خطأ في صغرو كان كيصرفقو باه أوه خوه لكبير أو واحد كبر منو، ونهار كيصرفقو المعلم كيصبروه ويقوليليه بحال الى صرفقك باك، وكيبقى غادي هاكة حتى كيصرفقو رجل امل وطبعا كيقولوليه راه غير على مصلاحتك بحال الى صرفقك باك، فالصغر كيكون مجبر يختار بين التصرفيقة أو يجري عليه من الدار( داكشي ديال قطع عليه المصروف كيشوفوه غير في الأفلام)، كيكبر كيلقى راسو مجبر يختار بين تصرفيقة أو شهورة في الحبس، كيعتابر القايد بحال باه وصرفقو لمصلاحتو وكيزيد مع الطريق.

في الغرب دايرين نزام غرامات كبير في حالة خالفتي حظر التجوال والى معندكش باش تخلص الغرامة كاين عقوبات حبسية بديلة، ولكن في الغالب الناس كتخلص الغرامة، في المغرب الوقت محاكة شوية لذا نظام غرامات كبير رادع مخدامش بزاف اذن الحبس هو الحل، وطبعا ملي كتلاقى مع شي قايد إنساني كتوقف القضية عند التصرفيق، الموشكيل هو بعض المغاربة ماباغين لا يتعاقبو بالحبس ولا الغرامة ولا التصرفيق باغين الدولة تعامل معاهم بحال شي أم مع ولدها المراهق يديرها كحلة زحلة وتسمحليه وتراعيليه، طبعا أفضل حاجة وأكثرها تحضرا وأرقى ما وصلات ليه الإنسانية راه هو القانون وخاصو يتطبق كيما هو وعلى كولشي، وماشي من حق أي رجل أمن أو سلطة يصرفق شي مواطن نهائيا، والى خالف القانون يطبقو معاه، ولكن في نفس الوقت تقدر تشد شي واحد دابا وتدير معاه القانون وتسيفطو للحبس وإحتمال كبير تكون سيفطتي حامل للفيروس باش يختالط مع على الأقل ربعين واحد فالشامبري، أو غرامة في هاد الوقت ديال الأزمة كيبقى المسمن وجبة ساخنة تأكل على مهل لكن بدون تلذذ.

 

موضوعات أخرى

13/08/2020 19:30

قريب وزارة الصحة تخرج إحصائيات مفصلة على الوفيات.. والمرابط عطا تسريبات ل”كود”: الأغلبية الساحقة داللي ماتو عندهم عوامل الاختطار

13/08/2020 19:00

هادي هي الوقيتة فين خاص الحكومة تكون عندها الشجاعة وتعلن أن الوضع غير متحكم فيه وأن لي جاتو كورونا دابا وصحتو على قد الحال راه احتمال كبير يموت كيف مكانت كتردد في كل مناسبة فاللول أن الوضح متحكم فيه

13/08/2020 18:50

أخبار كتروج على تلوث مياه سيدي حرازم.. وزارة الصحة كتوضح : هذشي كان شحال هذي.. وحدة الإنتاج دالشركة دابا خالية من أي تلوث

13/08/2020 18:30

صحاب النقل السياحي دايرين اعتصام مفتوح بسبب أزمة كورونا.. ونقابي لـ”كود”: تقصينا من برنامج دعم القطاع السياحي.. والمسؤولين عطاونا بالظهر والأبناك شادين معانا الزكاير

13/08/2020 18:00

مجتمع ذكوري وشبعان كبت.. المتخلفين فأنستكَرام شبعو سبان فرباب ازماني مرات فريد غنام بسباب كسوتها (اللي عااادية) فإشهار

13/08/2020 17:45

هادشي كيخلع.. لليوم الثاني المغرب كيحطم الروكور فالوفيات بكورونا.. 28 مغربي ماتو و1241 تصابو و1010 براو.. الطوطال: 37935 مصاب و584 متوفي و26687 متعافي و10664 كيتعالجو