وكالات//

من بعد غياب ديال 8 سنين على التمثيل، رجعات ميغان ماركل، دوقة ساسيكس، للساحة الفنية، وحسب مصدر قريب منها صرّح لمجلة بيبول، فهي حاسّة براسها “مرتاحـة وفرحانة بزاف” فالدور الجديد ديالها.

وحسب صحيفة ذا صن، ميغان كتشارك فالفيلم الجديد ديالها مع النجمتين ليلي كولينز وبري لارسون، وتشافات فموقع التصوير ديال المسلسل “Close Personal Friends” التابع لشركة Amazon  MGM Studios فباسادينا، كاليفورنيا.

المصدر قال: “ميغان كانت فموقع التصوير اليوم، باينة مرتاحة وفرحانة بزاف، تعرّفات على جميع الناس، وكانت لطيفة وبسيطة فالتعامل ديالها”.

وزاد مصدر من استوديو ذا صن وقال إن رجوع ميغان هو “لحظة كبيرة” فالمسار ديالها، وهاد العودة كتشكل بالنسبة ليها طريقة هادئة باش ترجع تجرب الإحساس ديال التمثيل وتشوف واش باقي كيعجبها الجو ديال البلاطو، مع الحرص الكبير على السرّية فالمشاركة ديالها.

وفالفيلم اللي سميتو “صديقان شخصيان” كيمثلو حتى جاك كويد وهنري جولدينغ، وتعلن عليه فغشت اللي فات، والمخرج هو جيسون أورلي، اللي دار فيلم مراهقة كبيرة(Big Time Adolescence)  حسب هوليوود ريبورتر.

القصة كتدور على جوج أزواج كيتلاقاو مع جوج مشاهير فواحد الرحلة لسانتا باربرا، كاليفورنيا. التصوير بدا فـلندن ومن بعد كملوه فكاليفورنيا.

وجدير بالذكر أن ميغان والأمير هاري انتقلو يسكنو فـسانتا باربرا عام 2020، من بعد ما تخلّاو على المهام الملكية ديالهم فالمملكة المتحدة، ومازالين ساكنين تماك مع ولادهم: الأمير آرتشي (6 سنين) والأميرة ليليبيت (4 سنين).