وكالات//

غادي تبدا فرقة الكيبوب المعروفة  BTS (بي تي إس) فشهر أبريل الجاي جولة حفلات عالمية، واللي غادي تشمل حتى الشرق الأوسط، حسب ما علنات شركة الإنتاج ديالها نهار الأربعاء.

وكانت الفرقة الكورية الجنوبية، اللي ولات ظاهرة عالمية، حبسات الأنشطة ديالها فـ2022 باش تخلي الأعضاء ديالها يأدّيو الخدمة العسكرية الإجبارية اللي مفروضة على جميع الرجال الكوريين الجنوبيين اللي ما فاتو 30 عام.

ومن بعد ما تسّرحو الأعضاء السبعة ديال بي تي إس من الخدمة العسكرية، علنات الفرقة على الرجوع ديالها للساحة فربيع 2026، من خلال ألبوم جديد غادي يخرج نهار 20 مارس الجاي.

والبرنامج ديال الجولة كيتضمّن 79 موعد ديال لقاء مع الجمهور فـ34 مدينة، وهاد الشي كيجعلها أكبر جولة فالتاريخ ديال فرق الكيبوب من حيث العدد الإجمالي ديال الحفلات.

وغادي تبدا هاد الجولة العالمية، وهي الأولى للفرقة من بعد 4 سنين، من مدينة غويانغ فكوريا الجنوبية نهار 9 أبريل، مع تنظيم جوج حفلات خرين فبلادهم قبل ما يمشيو لليابان، حسب شركة هايب اللي كتسير أعمالهم.

ومن بعد، غادي تدوز الفرقة من الولايات المتحدة وعدد من الدول الأوروبية، من بينها فرنسا نهار 17 و18 يوليوز. ومن المرتقب تسالي الجولة فشهر مارس 2027 فمدينة مانيلا.

وأضافت الشركة المنتجة لأعمال الفرقة السباعية باللي مدن خرين غادي يتزادوا لبرنامج الجولة، خصوصاً فاليابان والشرق الأوسط.