كود اسماء غربي ////

الحراك فالريف اللي مازال شاعل عرى حوايج كثيرة. عرى فالمقال الاول وزراء هاد الحكومة. من النهار الاول كنقولو ليكم راه ابن عرفة العدالة والتنمية ما يمكنش يعول عليه الواحد. فهاد الحراك ما تحركش. كال ليك كندير اجتماعات مع الوزراء، واش انت رئيس حكومة باش دير اجتماعات فراسك غير انت. علاش ما كتهدرش مع الشعب علاش ما كتهدرش مع صحاب الحراك اش من مبادرة خديتيها انت ولا حكومتك.

انت وصولك خطأ وتعيينك خطأ وهاد الشي اللي وصلنا ليه اليوم نتيجة منطقية، المنطلقات كانت خاطئة والنتيجة خاصها تكون عوجا.

دابا خاص الحساب خاص كل واحد تحمل مسؤولية هاد الوضع يخلص. ماشي غير مشاريع الحسيمة منارة المتوسط. راه المشكلة سياسية. حزب ربح انتخابات وتعين امينو العام باش يدير حكومة ودارت تمثيلية حتى واحد فالمغرب ما صدقها وشفنا الويل والعبث لدرجة فرض حزب بزز يدخل اللي هو الاتحاد الاشتراكي. واش هاداك الشي اللي دار لبنكيران كتعتاقدو اللي صوتو عليه وهما ماشي من حزبو حقاش حزبو باعوه فالدورة٬ واش هادوك الناس غاديين ينساو. هاد الوفقات هاد المسيرات راها شكل من اشكال التعبير عما شهدته الانتخابات من 2015 الى 2016. تهييج وتدخل سافر للدولة ومحاولة فرض حزب بعينه. هاد الشي كان فالحسيمة بشكل فاضح بزاف بزاف. كاينين بيانات احزاب كاين تنبيهات وكاين وكاين.

بنكيران اللي ربح انتخابات ولعب دور كبير للدولة فمواجهة كاع الاشكال الاحتجاجية حيدوه بناء على تقارير كاذبة تحذر منه وجابو فبلاصتو شخص فاول امتحان صرط لسانو وتخبى. شكون اللي بقى فالواجهة؟ الملك ثم القوات العمومية. يعني الملكية ولات فمواجهة الاحتجاجات فالريف. شفنا اش قالو من الزفزافي الى امه الى والده الى نوال بنعيسى الى باقي الفاعلين. باغيين الملك. يعني ما بقات ثقة فشي حد اخر. هاد الشي كلشي مسؤول عليه ماشي مسؤولية الاحزاب.

الاحزاب دارت محاولات بامكانياتها باش طور راسها ولكن ما خلاوهاش. شوفو اش وقع فالاستقلال. جابو شباط وباش سالاو منو بغاو يلوحوه وهو يدير ليه البيضة فالطاس. دابا باغيين يجيبو واحد اكثر من ابن عرفة العدالة والتنمية اللي هو نزار بركة. ماشي بحال هاد السياسيين نقدرو نواجهو غدا بحال حراك الريف.

خاص سياسيين كيتكلمو بصدق ماشي كيكذبو بحال شي وحدين يتنفسون الكذب. خاص الدولة تبعد من الاحزاب تخليهم يضاربو بيناتهم.

الانفصاليون الحقيقيون هما اللي كذبو على الملك من الانتخابات البلدية الى الانتخابات التشريعية الانفصاليون الحقيقيون هما بعض السياسيين ماشي كلهم اللي كيبعو صحابهم باش يحافظو على مصالحهم وباش تنوض شي حاجة كيضربو الطم. الانفصاليون الحقيقيون هما هادوك التجار ديال الهدرة اللي ربحو بزافت لفلوس وكذبو علينا ف2007 باش يجيبو الناس تصوت واليوم كيعطيو الدروس. هادو همهم مصالحهم. بنكيران باش قال ما باغيش رضاة الملك كان على حق. الملك ما خاصوش اللي يرضي عليه خاصو اللي كيقول ليه الصدق وما كيكذبش عليه. من غيرهم راهم كيلعبو بهاد الوطن