محمد سقراط-كود///

كما عودتكم گود كل عام كنتجمعوا في المقر أو في أحد مكاتب الفروع ديالنا داخل المغرب أو خارجه، وكنختاروا رجل السنة في المغرب، وهاد العام تجمعنا في فرع المكتب ديالنا بأغبالو ن سردان وهي جنة بين بني ملال وإيملشيل، وعلى أنغام حوسي أمرابط وفاطمة تاولكاديت جرات نقاشات حول شكون يستاهل رجل السنة بامتياز، بحكم أن طاقم گود كيجمع ألمع العقول التحررية المغربية في الاختيار مكانش ساهل، كاين لي بغا عصيد يكون رجل السنة بحكم أنه كل عام عندنا فلائحة، وبحكم الإسهامات ديالو في الوقوف قبالة القادوس ديال الخوانجية وهرگاوة وتعريض نفسه للخطر مقابل تنوير عقول المغاربة وتعزيز الشعور الوطني عندهم، وكاين لي ختار حسن الفذ من غير نجاحه ككوميدي كل سنة ولكن الخرجات الحوارية لي دار هاد العام كان عندها أثر كبير في المجتمع وبالخصوص إحياء مصطلح هرگاوة، وكانت مرشحة لمياء بومهدي بما أنها حققات أهم لقب إفريقي لمازيمبي، وأكدات أنها مراة مغربية حرة وقادة وتستاهل حقها في الورث كامل وماتستاهلش التعصيب في رزق باها.

وبعد نقاش طويل ومستفيض ومتشبع ومتنوع تنوع ماحضر من قطعة ومشروبات وحلوة لاكريم، وتنوع الحناجر والأصوات الأطلسية لي كانت تخرج من جهاز جي بي إل كلوب جابتو لينا سهام سيفطوا ليها خالها من فرنسا، قررنا أن الأحق بجائزة رجل السنة دون منازع هو الوزير المحبوب عند المغربيات عبد اللطيف وهبي أكثر واحد مدافع على حقوق المرأة في المغرب وحتى حقوق الرجل العصري كما تحبه گود، والوزير لي مآمن أن الحداثة خاص يكون مصدرها التشريع هو اللول ومن بعد غادي تطغى على باقي مناحي المجتمع، ولكن البداية خاص بتحديث منظومة العدل والتقاضي والحقوق ومدونة المرأة والقانون الجنائي، وهبي راه من أكثر الوزراء ثورية لي دازو في تاريخ المغرب، لأنه ثائر على الجمود ديال النصوص القانونية وجمود المساطر في وحدة من أهم الوزارات في المغرب، وهادشي بدون مساعدة أو سند من حتى شي حد، حتى حزبه تخلى عنه، بالإضافة إلى أنه أفضل وزير في التواصل وكيعطي الملحة والسر للحكومة في جانبها الحداثي، ولا يخشى في الحق لومة لائم، وطبعا بوحدو واقف في وجه الإسلاميين ومحمقهم لدرجة كاين لي يطالب برأسه، ورغم شيطنته يوميا في مواقع التواصل إلا أنه عارف أنها أصوات مداويخ التاريخ لا تسمن ولا تغني من جوع.

طبعا اختيارنا لشخصية السنة لا ترافقه جوائز أو حفلات بحال المؤسسات الأخرى، ولكن فقط أن گود تختار أي واحد شخصية السنة هو وسام يحمله كيعني أنه راه رمز للحداثة والعقلانية والتعايش والتمغرابيت، لأن گود لا ترمي التشريفات غير هكاك، داك الساعة كون ختارينا لعاب ديال كورة يكون شخصية السنة ونسيفطو ليه كتاب مجمل تاريخ المغرب ديال العروي كجائزة ونخرجوا من باب واسع، ولكن لأنه عندنا سمعة ومصداقية عند المغاربة فراه اختيارنا تشريف وتكليف في نفس الوقت تشريف لأنه جا من عند صوت الحداثة في المغرب، وتكليف لأنه كيعني أنك الآن في واجهة المعركة ضد قوى الظلام وأسالاس.