گود سبور//

اعترف السويسري جياني إنفانتينو بمشكل حرارة الطقس اللي واجه كأس العالم للأندية “الميريكان 2025″، وفنفس الوقت حاول يطمن عشاق كرة القدم بخصوص مونديال الأمم 2026، اللي غايكون التنظيم ديالو ثلاثي بين الميريكان وكندا والمكسيك.

وفتصريح له اعترف جياني إنفانتينو رئيس الفيفا بتأثير الحرارة على ماتشات مونديال الأندية فالميريكان، وواعد بأنهم غايلقاو لها حلول فمونديال الأمم العام الجاي، وقال: “خاصنا نفكرو فشنو الحوايج اللي نقدرو نحسنو منهم، عطينا فترات راحة لتبريد الاجواء ورشينا التيرانات”.

وكمل رئيس الفيفا، وقال: “عندنا تيرانات مغطين وغانخدمو بأغلبها بنهار، وكاينين 5 التيرانات مغطيين من 16 تيران مخططين لهم يتلعبو فيهم ماتشات كاس العالم، العام الجاي عندهم سقوفا باش كايتسدو”.

وتلقى مونديال الاندية “الميريكان2025” انتقادات كبيرة بسبب الحرارة حيث المباريات تلعبو بزاف بنهار، وتوقف الماتشات بسبب العواصف، أما تنظيميا فالبطولة كانت مزيانة وكانت الأمور مضبوطة.