كود اكادير//

مباشرة بعد مقال كود لي هضر على خرق القانون من طرف لوبي الطاكسيات لي مابغاش يمتاثل للقرار الولائي رقم 41/23 لي كايمنع جولان الطاكسيات الصغار وحتى الكبار لي عمرهم كثر من 15 عام تدخل الوالي أمزازي.

مصدر قال لـ”گود” إن الوالي أمزازي تدخل اليوم وطلب من البوليس يمنعو البوانتاج ديال هاد الطاكسيات وتوقف على الخدمة في انتظار يقادو صحاب هاد الطكسيات القدام الوضعية ديالهم.

هاد الطاكسيات عددهم 130 طاكسي من الفئة بـ(طاكسي صغير)  والأغلبية ديالهم من بوجو 205 وفيات أونو 1998 وصحابهم عندهم مشاكل وباغيين يبقاو خدامين بهاد لافيراي حيث مول لكريمة مات ولا مشكل آخر.

مصدر كود قال بلي التسيب لي كايعرفو قطاع الطاكسيات فأكادير غادي يسالي، حيث أمزازي غادي يمنعو خصوصا وأن المدينة السياحية الثانية فبلادنا عندها رهانات كبيرة وسيدنا باغي تكون فمستوى عالي.