الرئيسية > كود-تيفي > بعد كثر من عام ديال السدان.. محمد الجم دشن المسرح فالمغرب ب”جا وجاب” وصرح لـ”كود”: العرض داز مزيان والحضور كان كبير – فيديو
12/06/2021 12:00 كود-تيفي

بعد كثر من عام ديال السدان.. محمد الجم دشن المسرح فالمغرب ب”جا وجاب” وصرح لـ”كود”: العرض داز مزيان والحضور كان كبير – فيديو

بعد كثر من عام ديال السدان.. محمد الجم دشن المسرح فالمغرب ب”جا وجاب” وصرح لـ”كود”: العرض داز مزيان والحضور كان كبير – فيديو

عفراء علوي محمدي- كود//

فتتح الفنان المسرحي المغربي، محمد الجم، المسارح المغربية بعد أزيد من سنة من الإغلاق، بمسرحية “جاو وجاب”، اللي تعرضات لبارح الجمعة فالعشية، فمسرح محمد الخامس فالرباط.

والمسرحية، اللي كان سبق خدات دعم من وزارة الثقافة، وحظات بإقبال كبير من طرف الجمهور، وحضرو ليها العشرات، ومازال غدير تورني على مختلف المدن المغربية.

وفتعليقو على العرض، قال الجم انه كان ناجح بكل المقاييس، وكان الحضور مميز “بحكم أنه كان من المفروض يجيو 50 فالمية من الناس للمتابعة، والحمد لله وصلنا لهذ العدد، والعرض كان على أحسن وجه وكان تجاوب ديال الجمهور، وتخدات جميع الإجراءات الاحترازية ديال الجائحة”، على حد تعبيرو.

وزاد الجم، فتصريحو ل”كود”: “الناس خرجات فرحانة وعشنا ديك اللحظات اللي فقدناها هذي واحد 15 لشهر، وكنا حسينا بواحد القطيعة بيننا وبين الجمهور ديالنا، لأنه داك التجاوب اللي كيخلق لينا وديك الحميمية اللي كنكونو كنوصلو ليها فقدناها فهذ المدة، والحمد لله دابا استرجعناها، والناس ولات باغة المسرح وتنفس شوية وتشوف أجواء الفرحة والنشاط والمتعة الحية على خشبة المسرح”.

وكانت هذ المبادرة، كيقول الجم من وزارة الثقافة ومسرح محمد الخامس، اللي فضلو يفتتحو الموسم المسرحي فهذ الفترة مباشرة، حيت عندهم عروض مع مجموعة من الفرق اللي ملتزمين بيها.

وختم الجم تصريحو بالقول: “إلى الامور بدات تتحسن غنعاودو ننظمو جولة على بعض المدن، وكنتسناو الحدود تفتح باش نتلاقاو مع الجالية ديالنا، وهذشي غتفردو الوقت، لانه هوما دابا غادي يخلو وإن شاء الله غيمكن حنا نمشيو نزوروهوم خارج الوطن”.

والمسرحية من  تاليف محمد الجم، وإخراج عبد اللطيف الدشراوي، وكيشخصوها مجموعة من الممثلين المعروفين ففرقة المسرح الوطني، بحال الجم، ونزهة الركراكي والهاشمي بنعمر وسعاد خويي وعبد القادر بوزيد وآخرون.

https://m.facebook.com/story.php?story_fbid=1901361216714054&id=100005205818825

موضوعات أخرى