وكالات//

فمفاجأة كانو المعجبين ديالو كيستناوها من مدة، طلق النجم الكندي جاستن بيبر الألبوم الجديد ديالو اللي سماه”SWAG”، وخلق بيه الحماس من جديد وسط جمهورو، خصوصا من بعد فترة ديال الغياب على الساحة الفنية.

هاد الألبوم اللي خرج نهار الجمعة، كيحتوي على 21 أغنية، وكيدوم لأكثر من 54 دقيقة ديال موسيقى متنوعة. وكيعتبر أول عمل كبير كيصدرو جاستن، اللي عندو دابا 31 عام، من بعد ثلاث سنين ديال الصمت الفني، حيث آخر أغنية كانت”Honest” اللي دارها مع الفنان دون توليفر، وآخر ألبوم كامل دارو كان “Justice” فـ2021.

فهاد الألبوم”SWAG”، جاستن جمع مجموعة من الأسماء المعروفة فـ عالم الهيب هوب، بحال غونا، وليل بي، وكاش كوبين، وهاد الشي كيبين أنو متجه نحو ستايل موسيقي أكثر جرأة وحيوية.

وقبل ما يطلق الألبوم بسويعات، جاستن بيبر شارك مع المتابعين ديالو فـ إنستغرام فيديو فيه لائحة الأغاني كتبان فـ شاشة عملاقة فـ تايمز سكوير فـ نيويورك، وهاد المشهد زاد شعل الحماس قبل ما يخرج الألبوم.

وزادت الإثارة بعدما بانو ملصقات الألبوم مؤخراً فـ العاصمة الآيسلندية ريكيافيك، اللي كيتقال أن بيبر كان فيها فرمضان اللي فات (أبريل) باش يسالي آخر الروتوشات على المشروع، حسب ما قالت بعض التقارير الإعلامية.