الوالي الزاز -كود- العيون///
[email protected]

قالت جبهة البوليساريو فبيان ليها فأعقاب جريمة القتل البشعة اللي تعرض ليها شاب أول البارح الثلاثاء، فيما يسمى ولاية أوسرد فمخيمات تندوف، أنها وقفات مجموعة من المشتبه فيهم بالضلوع فهاد الجريمة.

وما كشفاتش البوليساريو عن عدد المشتبه فيهم فجريمة القتل اللي تعرض ليها عشريني من قبيلة “الرگيبات البيهات” بعد تعرضوا لجوج طعنات واحدة فالصدر حدا القلب وأخرى فالرأس، مشيرة أنها حددات أماكن تواجدهم ووقفاتهم وكتحقق معاهم باش تحدد الملابسات.

هاد البيان كيجي من بعد الضغط الكبير من طرف عائلة القتيل والدعم اللي حازتوا من طرف الرأي العام فمخيمات تندوف، تزامنا مع حالة الإنفلات الأمني المتصاعدة فالأشهر الأخيرة بسباب نشاط العصابات الإجرامية والتهريب، والتي لا تتوانى فإستعمال حتى الرصاص فالمواجهات بيناتها، وكذا إحراق السيارات والمحلات التجارية كأسلوب للتصفية والإنتقام.