كود سبور//

لأول مرة وبعد سنوات، كيعرف ربع نهائي مسابقة دوري ابطال إفريقيا غياب ممثل للكورة المغربية، وبالضبط غياب الوداد والرجاء الرياضيين اللي ديما كانو حاضرين فهاد المرحلة من المسابقة فالسنوات الأخيرة، وهذا الشي وقع بعد اقصاء الاول من دور المجموعات والثاني اللي ما شاركش گاع فالمسابقة، مع العلم ان الجيش الملكي ودع البطولة قبل مرحلة الگروبات.

قرعة ربع نهائي دوري أبطال افريقيا تسحبت اليوم الثلاثاء فالعاصمة المصرية القاهرة، وكان واضح بشكل كبير غياب الكورة المغربية عليها، خصوصا وان السنوات الماضية تعود الجمهور الافريقي والعربي على منافسة الوداد بشكل كبير على اللقب والتتويج به وعلى الاقل الوصول للفينال، وتواجد الرجاء فالربع وفالدومي فينال، عكس هذا الموسم اللي تراجع نيفو الاندية المغربية بشكل كبير على المستوى القاري.

وتأثر الوداد بالمشاكل الداخلية ديالو ورحيل الرئيس سعيد الناصيري، وهذا الشي أثر على مستواه وودع من دور المجموعات فواحدة من أكبر المفاجآت ديال المسابقة، والرجاء اللي خرج عليه الرئيس السابق عزيز البدراوي بالتسيير الكارثي ديالو وخلاه الموسم الماضي ما قادرش حتى ينافس على ضمان التأهل لشي مسابقة من المسابقات الإفريقية سوا شومبيونزليگ او كاس الكاف، والجيش الملكي اللي بعد سنوات من الغياب على دوري ابطال افريقيا، والرجوع ديالو للمشاركة فيها هذا الموسم كبطل للمغرب، ما قدرش يتجاوز حتى الدور التمهيدي وودع المسابقة بكري.

التساؤل دابا كيتطرح والمخاوف على مستقبل مشاركات الاندية المغربية فدوري ابطال افريقيا بعد هذا التراجع المخيف والاقصاءات المبكرة من النسخة الحالية، خصوصا وان النيفو ديال البطولة المغربية فتراجع واضح وملموس لمجموعة من الأسباب، وهذا الشي يقدر يخلينا نشوفو غياب للفرق المغربية على منصة تتويج فشومبونزليگ لسنوات أو عقود إذا ما كانش تخطيط داخل الاندية، ويعاود يوقع سيناريو الغياب الطويل على منصة التتويج، كيفما وقع ما بين 1999 ملي كانو الرجاء ربحو اللقب وانتظر وراها الجمهور المغربي 16 عام باش يشوف الوداد كيربحو اللقب عام 2017، قبل ما يأكدو تواجد الكورة المغربية بعدها فرادس وفينال اللقب المسروق عام 2019، وتتويج باللقب عام 2022 وخسارة الفينال عام 2023، مع العلم ان قوة الاندية على المستوى القاري كيعكس التطور اللي وصل له اي بلد من جميع النواحي تسييريا وتقنيا.

نتائج قرعة ربع نهائي دوري أبطال إفريقيا جات كالتالي:

سيمبا التنزاني             /   الاهلي المصري
مازيمبي الكونگولي      /   بيتروي أتليتيكو الانگولي
الترجي التونسي           /   أسيك ميموزا الإفواري
يونگ أفريكان التنزاني  /   صن داونز الجنوب إفريقي