كود -عثمان الشرقي//

فلايف مباشر تابعوه بزاف ديال الناس على حسابها فـ”تيك توك”، خرجات الفنانة “الشيخة مريم” وهدرات على أسباب ابتعادها فالفترة الأخيرة على مجموعة “أحوزار”، وأكدات أنها قررات تعتازل المجال الفني بشكل نهائي.

وقالت مريم باللي هاد القرار جا من بعد الضغوط النفسية الكبيرة اللي عاشتها بسبب اللي تعرف إعلامياً بـ”واقعة منصة مهرجان إفران”، وضافت أنها دازت من أزمة نفسية صعيبة بعد سنوات طويلة ديال الخدمة والعطاء فالساحة الفنية كتقدر ب25 سنة ديال الخدمة مع أحوزار.

وهدرات الشيخة مريم حتى على مغادرة زمليتها الشيخة سمهان للمجموعة فعرس خاص بني ملال، كيف ما وضحات أنها ما كانتش حاضرة ، ولكن توصلات بالخبر مباشرة ملي وقع الصداع وخلاّت سمهان المجموعة وتمنات ليها التوفيق فالـحياة والمسيرة الفنية ديالها.

كما تطرقات للشائعات والكواليس اللي راجت فالفترة الأخيرة، وقالت إنها فضلات ما تردش بنفس الأسلوب وما تصعدش الخلاف ومتلتجأش للصحافة، وأن العدالة الإلهية هي اللي غادي تنصف كل واحد.

آراء المتابعين بقات منقسمة بين اللي كيشوف أن الاعتزال جا تحت تأثير الأزمة النفسية وتقدر فأي لحظة ترجع إلا عفا عليها أحوزار، وكاين اللي كيعتبرو أن قرار نهائي وحاسم باش تسالي هاد المرحلة وتنتصر من حياتها وتنتصر لكرامتها خصوصا مع تقدمها في السن.