كود سبور//

بدات الشركات البريطانية، كاتنفتح على السوق المغربية، وباغيين يستغلو فرصة المغرب لكأس العالم 2030، فالملف الثلاثي مع إسبانيا والبرتغال، باش يربحو مارشيات فالمغرب.

وأعلنت السفارة البريطانية بالمغرب فبلاغ لها اليوم الثلاثاء، أنه فالوقت اللي كايعزز فيه المغرب الاستعدادات ديالو لاستضافة كأس العالم 2030، داير وفد ممثل لـ12 شركة بريطانية زيارة إلى المملكة المغربية.

ووضحت سفارة بريطانيا بالمغرب، أن الهدف من زيارة وفد الشركات البريطانية للمغرب، هو  استكشاف فرص التعاون فمجال البنية التحتية لتحقيق الشراكة التجارية بين المملكتين.

للإشارة فملعب الحسن الثاني الجديد اللي غايتبنى فمنطقة بن سليمان نواحي الدار البيضاء، ربحت صفقة البناء ديالو شركة “بوبيلوس” البريطانية، ومن المنتظر يكون من أكبر التيرانات فالعالم بطاقة استعابية كاتوصل لـ115 ألف متفرج، ومرشح بقوة لاحتضان نهائي مونديال 2030.