كود سبور//

غايشكل نجم ليل الفرنسي الصاعد أيوب بوعدي، نقطة صراع جديدة بين الجامعة الملكية المغربية لكرة القدم ونظيرتها الفرنسية، حيث عندو دوبل ناسيوناليتي.

وحسب مجلة Footafrica، فالجامعة الملكية المغربية لكرة القدم بدات كاتحرك باش أيوب بوعدي مول الـ17 عام، يكون متاح مستقبلا لحمل توني المنتخب الوطني المغربي، بعدما سبق له ولعب مع الفئات السنية ديال المنتخبات الفرنسية.

وأكد نفس المصدر ان اللاعب واخا صغير فالعمر، ولكن الإمكانيات اللي عندو والمستوى اللي مقدم هذا الموسم مع ليل الفرنسي ، خلات الأنظار تسلط عليه ويقدر يكون عنصر مهم فالمنتخب المغربي، اللي كاينجح بشكل كبير أنه يقنع اللاعبين اللي جنسيات مزدوجة.

وزادت وضحت Footafrica أن ايوب بوعدي اللي كايلعب وسط التيران، طلعت القيمة السوقية ديالو بعدما بان فالماتشات اللي فاتت إلى 6 مليون أورو، وهذا الشي غايخليه يتطور يمشي لفرق كبيرة.

للإشارة فالاتحاد الفرنسي لكرة القدم، عيط على ايوب بوعدي اللاعب الشاب من اصل مغربي اللي عندو 17 عام، باش يشارك مع المنتخب الفرنسي لاقل من 20 عام ضد المنتخب المغربي فجوج ماتشات وديين يوم 11 و 14 أكتوبر الجاري، وهذا الشي تزامن مع اشادة الناخب الوطني وليد الركراكي الخميس الماضي بموهبة اللاعب، خلال تصريح له وهو كايعلن على لائحة المنتخب المغربي استعدادا لمواجهة أفريقيا الوسطى ضمن اقصائيات كاس افريقيا 2025.

وكانت الجامعة الملكية المغربية لكرة القدم تفوقت على عدد من اتحادات كرة القدم فأوروبا ومن بينها الاتحاد الفرنسي، فإقناع اللاعبين مزدوجي الجنسية باللعب للمنتخب المغربي، واخا كايكونو لعبو مع الفئات السنية لمنتخبات البلدان اللي تزادو فيها، واخرهم إلياس بنصغير وامين عدلي اللي ختارو المغرب على فرنسا رغم إغراءات الفرنسيين.