كود – وكالات//

الزلزال اللي ضرب كولومبيا بقوة 7.4 درجات نهار 10 غشت، خلّى أزمة إنسانية كبيرة فالجهة الغربية ديال البلاد، خصوصاً فإقليم تشوكو اللي أصلاً كيعاني من مشاكل كبيرة فالبنيات التحتية والفقر والعزلة، الزلزال تسبب فأضرار كبيرة فالدور والمدارس والمباني العمومية.

فهاد الظروف، مشات المغنية الكولومبية شاكيرا لمدينة كيبدو، عاصمة تشوكو، مع رجل الأعمال والفاعل الخيري الأمريكي هوارد غراهام بافيت، ولد الملياردير الأمريكي المعروف وارن بافيت.

كيف ما علنات شاكيرا أنها غادي دير مجهوداتها باش تعاود تبني جامعة تشوكو التكنولوجية، اللي تضررات من الزلزال وولات من بين الأولويات فخطة إعادة تأهيل قطاع التعليم فالمنطقة.

وقالت شاكيرا بلي بافيت غادي يتعاون مع مؤسسة Barefoot التابعة ليها، باش تبني 10 مدارس جديدة فمدينة كيبدو والمناطق القروية التابعة للإقليم، بهدف يرجعو  التلاميذ يقراو فمؤسسات مآمنة، وما يضيعوش مدة طويلة من الدراسة بسبب الكارثة.

وأكدات المغنية أن كل نهار كيدوز بلا ما الأطفال يمشيو للمدرسة كيعني تأجيل جزء من مستقبلهم، كيف ما قالت أن الاهتمام بتشوكو خاصو ما يختفيش من بعد ما تسالي المرحلة الأولى ديال الأزمة.

وبخصوص التمويل، وصل أول إعلان للمساعدات إلى مليون دولار مخصصة للمدارس. حركة Global Citizen غادي تساهم بـ500 ألف دولار، بينما غادي توفر شركة تنظيم الحفلات Live Nation 500 ألف دولار أخرى. هاد الأموال غادي تمشي لإعادة بناء المدارس اللي تهدمات أو تضررات بسبب الزلزال.

أما إعادة بناء الجامعة، فشاكيرا علنات عليها كمبادرة شخصية، ولكن لحد الآن ما تعلنش على الميزانية النهائية ديال المشروع ولا على التاريخ اللي غادي تبدا فيه الأشغال.

وشاكيرا دعات حتى حكومات كندا واليابان وبريطانيا، إضافة للقطاع الخاص والمؤسسات الخيرية، باش يساهمو فمجهودات الإغاثة وإعادة الإعمار، خصوصاً أن عدد كبير من السكان مازال محتاج للمساعدة.