كود مرتيل//

في أجواء سياسية مشحونة، انتخب اليوم الجمعة البرلماني محمد العربي المرابط عن حزب الأصالة والمعاصرة، رئيس جديد لجماعة مرتيل، خلفا للرئيس المعزول مراد أمنيول، فجلسة احتضناتها القاعة الكبرى ديال الجماعة وسط حضور مكثف ديال المنتخبين وممثلي السلطات المحلية.

الانتخابات جاو بعد ما أعلن باشا مدينة مرتيل، التابعة لعمالة المضيق–الفنيدق، على فتح باب الترشيحات، ودخلو المنافسة ثلاثة أسماء: جابر أشبون عن الاتحاد الاشتراكي، محمد العربي المرابط عن البام، وصوفيا دروان عن الحركة الشعبية، اللي سحبات ترشيحها فآخر لحظة بعد توافق سياسي واسع خلا الكفة تميل لصالح مرشح الأصالة والمعاصرة.

وحسب مصادر مطلعة فالمشاورات المكثفة اللي سبقات جلسة التصويت، جمعت بين وكلاء اللوائح وعدد من الفاعلين السياسيين، وساهمات فبلورة اتفاق يقضي بإسناد الرئاسة للمرابط، اللي تمكن من حسم السباق لصالحه بسهولة.

وجات تشكيلة المكتب المسير لجماعة مرتيل:

الرئيس: محمد العربي المرابط

النائب الأول: محمد النظير

النائبة الثانية: صوفيا دروان

النائب الثالث: فريد البوكاري

النائب الرابع: حسن اعلالي

النائبة الخامسة: إيمان فلاح الإدريسي

النائب السادس: أنس الفغلومي

فوقت اللي كيتطلع فيه عدد من سكان المدينة إلى تغيير حقيقي، يعطي نفس جديد لتسيير الشأن المحلي، خصوصا بعد التوترات اللي عاشها المجلس فالفترة الأخيرة.

المهتمين بالشأن المحلي كيشوفو أن المرحلة الجاية غتكون اختبار حقيقي للرئيس الجديد وفريقه، باش يبرهنو واش فعلا مرتيل غادي تدخل مرحلة استقرار وتنمية، ولا غتبقى الصراعات السياسية كتعطل المشاريع والمصالح ديال الساكنة، وإخراج المدينة من الصبغة ديال الموسمية اللي كا تعرفها فقط في الصيف ومن بعد ما يسود الكساد.