وكالات//

كشفات دراسة علمية جديدة داروها علماء من جامعة موناش الأسترالية، أن داك الضو والأشعة لي كتخرج من التيليفونات ولا البيسيات ولا حتى التلفزات بالليل، كيتسبب ديريكت في أمراض نفسية وعقلية خطيرة، ممكن تديك حتى للحماق.

هاد الدراسة، لي خرجات في مجلة “الصحة العقلية الطبيعية” المعروفة، ودارت على 86 ألف واحد، لقات أن 30 في المائة من هاد الناس ولا عندهم الاكتئاب الحاد، بعدما تعرضو لهاد الأشعة كل يوم تقريبا بالليل.

ولقات الدراسة، أن الناس لي مكيتعرضوش لهاد الأشعة كينقص عندها الخطر د المرض ف عقلها ونفسيتها بنسبة 20 في المائة.

الخطير في هادشي، هو أنهم لقاو أنها ما كتسببش غير الاكتئاب بوحدو، راه أمراض نفسية وعقلية كثيرة بانت بحال الفصال والتوتر العام، والسلوك الخطير ديال تأذي راسك.