كود الرباط//

بعد سلسلة نجاح العديد من الأعمال ديالو، خرج مغني الراب الغني عن التعريف طه فحصي و الملقب بـ ElgrandeToto البوم بألبوم لقى إقبال كبير بحال ديما حيت ليفان ديالو كانو متشوقين للإبداع ديال طوطو كيف عودهوم، الألبوم كيحمل اسم SALGOAT و مكون من 17 أغنية او تراك بلغة الراب.

اختيار الاسم مكانش عشوائي فطوطو اختار اسم Salgoat و اللي فيه كلمة GOAT القصد ديالها *الواعر في مجاله*، حيت الاسم قريب لكلمة سلكوط و هي كلمة نعتو بيها رئيس الحكومة السابق عبد الإله بنكيران، زعيم الإسلام السياسي، حيث اعتبر أن طوطو و الأمثال ديالو سلاكط.

هاد نعت لي دار بنكيران  وللي بطبيعة الحال كيف شافوه العديد من المتتبعين غير محاولة للفت الانتباه من مور ما تنسا وتهمش سياسيا ومؤسساتيا.

النعث بالسلگوط، خداها طوطو فكرة لتسمية العمل الجديد بطريقة مقصودة و اللي ساعات قليلة مور ما لاحو جاب عدد مشاهدات ردا على استفزاز  بتميزات، و اللي بغا يوصلو من خلاله انه داك اللي نعتيه بالسلكوط ها علاياش قاد، وأكد هادشي بتغريدة صريحة على موقع X.

من غير الاسم المثير ديال الألبوم، حاول طوطو كالعادة يهضر على بعض الظواهر الاجتماعية، بحال الهجرة غير الشرعية، فكانلقاوه كيشجع الشباب بطريقة غير مباشرة يبقاو فبلادهم كما أنه جاوب على بعض الانتقادات اللي كيجيوه و بلا مانساو شويا دالكلاشات لبعض الفنانين ديال الراب اللي ايعرفوهوم مزيان المتتبعين ديال هاد النوع الغنائي.

طوطو و الشباب بحالو كيشوفو فالراب متنفس و طريقة فالتعبير على اراءهم كشباب، و ان داكشي اللي كيحققوه من نجاح كافي باش يجاوب على الاستفزازات اللي كيحاولو يقولوها ليهم المعارضين ليهم خصوصا من الجيل السابق.