وكالات//

الأزمة ولات كبيرة بين الفنانة اللبنانية هيفاء وهبي ومدير أعمالها السابق، ووصلات حتى للمحاكم، بعدما هو مشى عند نقابة المهن الموسيقية ف مصر ودار شكاية ضدها بسبب خلاف خلاهم يستدعيوها، ولكن ما حضرتش.

البارح الخميس، كانت جلسة فالمحكمة الإدارية (الدائرة الثالثة)، باش يناقشو الدعوى اللي رفعاتها هيفاء ضد نقابة المهن الموسيقية والنقيب ديالها مصطفى كامل، بعدما تأجلات الجلسة اللي فاتت باش كل طرف يطلع على الوثائق ويتبادل المذكرات.

هاد الدعوى جات من بعد ما خرج تقرير من هيئة المفوضين كينصح بإلغاء القرار ديال النقابة اللي منع هيفاء من الغناء.

النقابة كانت خرجات، فـ 16 مارس اللي فات، قرار كيسحب التصاريح من هيفاء وهبي وكيمنعها تدير حفلات فمصر، وهاد القرار اعتابروه المحاميين ديال هيفاء خرق للحريات الدستورية، خصوصا حرية التعبير والإبداع الفني اللي مضمونة فالدستور، واللي كتحمّي الأعمال الفنية من الرقابة إلا بقرار من المحكمة.

تقرير المفوضين أكّد أن القرار اللي خذات النقابة مخالف للدستور وكيضرب فحرية الإبداع، وقال باللي النقابة تجاوزات الحدود ديال صلاحياتها بلا ما يكون عندها حكم قضائي.

هاد القرار ديال المنع جا بعدما مدير أعمالها السابق، اللي سميتو خالد مصطفى حسانين والمعروف بـ “خالد التهامي”، دار شكاية ضدها وكيقول بللي هي شوهات سمعته فالسوشيال ميديا.

ومن بعد، النقيب ديال النقابة عيط ليها جوج مرات باش تحقق معاها، ولكن ما مشاتش، وداكشي خلا لجنة التحقيق ترفض تعطيها تصاريح الغناء، وتمت المصادقة على القرار نهار 16 مارس 2025.