كود سبور//

طلقت جماهير الرجاء الرياضي حملة على مواقع التواصل الاجتماعي، تطالب من خلالها برحيل رئيس النادي عادل هالا بسبب الأزمة اللي طايح فيها الفريق، واللي حملوه المسؤولية فيها.

عادل هالا اللي قرر يخرج فراديو مارس، اليوم الجمعة فالعشية اعتبرت جماهير الرجاء الرياضي أن هذا الخروج ديالو ما غادي يقدم حتى شي إضافة وما عندو باش يفيد النادي ولا يقنع الرجاويين وغير مضيعة للوقت.

ورجعت جماهير الرجاء الرياضي لواحد تدوينة قديمة ديال عادل هالا نشرها عام 2019، يطالب فيها راديو مارس يبعدو على الرجا وقال فيها: “الرجا اللي محتاجة لراديو مارس، ماشي راديو مارس اللي محتاج للرجا.. أسيدي عطيونا غير التيقار، العيب علينا إذا جينا دقينا عليكم”.

جمهور الرجاء الرياضي على مواقع التواصل الاجتماعي بارطاجا السكرينات ديال هذه التدوينة، ووصفو رئيس النادي بالمتراجع على المواقف ديالو، وكيفاش كان اشد المهاجمين لراديو مارس وهو منخرط حتى ولى يخرج معهم وهو رئيس وقالو له الرجاويين: “الثبات على الموقف أهم من الموقف نفسه”.