الرئيسية > آش واقع > بعدما كثر فيها الترامي على الأراضي.. لجنة ضحايا مافيا العقار دارت وقفة احتجاجية فتمارة.. وعضو لـ”كود”: كيتقدر عدد الضحايا بالآلاف وبغينا إنصافهم ومتابعة المتورطين
11/04/2021 09:00 آش واقع

بعدما كثر فيها الترامي على الأراضي.. لجنة ضحايا مافيا العقار دارت وقفة احتجاجية فتمارة.. وعضو لـ”كود”: كيتقدر عدد الضحايا بالآلاف وبغينا إنصافهم ومتابعة المتورطين

بعدما كثر فيها الترامي على الأراضي.. لجنة ضحايا مافيا العقار دارت وقفة احتجاجية فتمارة.. وعضو لـ”كود”: كيتقدر عدد الضحايا بالآلاف وبغينا إنصافهم ومتابعة المتورطين

عفراء علوي محمدي- كود//

دارت لجنة ضحايا مافيا مكاتب الوداديات السكنية بإقليم الصخيرات تمارة، لبارح السبت، وقفة احتجاجية قدام العمالة، كتطالب فيها بإنصاف الضحايا اللي تسلبات منهم أراضيهم بطرق ملتوية، أو تم النصب عليهم بمشاريع سكنية وهمية، كيف كتطالب بمتابعة المتورطين فهذ الجرائم.

وفهذ الصدد، قال محمد النوحي، العضو باللجنة، وهو واحد من ضحايا هذ الوداديات، أن عشرات وداديات فالمنطقة متورطة فهذ الملف، سواء بسبب سوء تدبيرها، أو لسوء نية باش يموهو المنخرطين على اساس توفير سكن او بقع ارضية واستخلصو اثمنتها، لطن على ارض الواقع هذ المشاريع وهمية او ماكاملاش، وهوما كيتغناو بلا سبب وبلا عناء.

وزاد النوحي، فتصربحو ل”كود”، أن هذ الوداديات كتستغل بالدرجة اللولة الناس اللي ماقدرينش يتبعو هذ المشاريع، بحكم سكنهم فمدن أخرى أو فالمهجر، او أطر ماكيلقاوش الوقت باش يتبعو، ثم كيستغلو حتى الناس البسطاء اللي كيقصدو الوداديات للاستفادة من الامتيازات الضريبية.

وشاف النوحي أنه ماكاينش تجاوب كبير مع شكايات هذ الضحايا اللي كيتحسبو بالآلاف، على حساب ما قال، خصوصا وأن هذ الوداديات ماكتديرش الجموع العامة فالوقت باش تعلن على حصيلتها المالية بالتفصيل، وكتماطل فهذشي قدر الإمكان، بينما خاصها تعاقب من خلال سحب الأبناك ثقتها منها والقطع معاها معاها، وخاص منعها كذلك من تجديد الوصل.

وكشف ان رؤساء مكاتب بعض هذ الوداديات كتفرض على الضحايا يزيدوها فالأقساط، على اعتبار ان الفلوس اللي عطاو فاللول ماكافيينش، وكيبقاو يبتزوهم.

وقال أن هذشي كبر، وفإطار صمت المسؤولين، ولد قناعة لإنشاء اللجنة، اللي غتناقش القضية من الشقين الترافعي والاحتحاجي، وتطالب بحل هذ المشكل اللي قال انه كيتعتبر اكبر مشكل فتمارة، وهذشي كاين من 1980.

وختم تصريحو بالقول: “تحولات تمارة بهذشي لمناطق مهجورة ولات مرتع للإجرام والفساد، فالوقت اللي كان ممكن يكونو فيها أحياء سكنية ومشاريع اقتصادية”.

وللإشارة، فالأربعاء اللي فات تأسسات اللجنة محلية لضحايا الوداديات السكنية، اللي كينتميو ليها ضحايا لمافيا العقار والوداديات، وغتعتمد مجموعة من المحطات الاحتجاجية باش تعرف بقضية المتضررين وتسمع صوتهم فانتظار معاقبة النصابة لكبار.

موضوعات أخرى

17/05/2021 20:20

الحكومة و رجوع مغاربة العالم فهاد الصيف.. النائب البرلماني حجيرة: خاصها توضح الإجراءات اللي موجدة لهاد العملية – وثيقة