كود -وكالات//

من بعد التهديدات ديال مريكان رفضات طهران   تعاود تحل مضيق هرمز،و رفضات اتفاق ديال وقف إطلاق النار قبل الأجل اللي عطاه دونالد ترامب، واللي هدّد فيه بأنه يقدر “يمحي البلاد كاملة فليلة وحدة”.

من جهتها، قالت وكالة الأنباء الإيرانية أن الرد الإيراني جا فيه 10 نقاط، ومن بينها إنهاء الحرب فالمنطقة، ووضع بروتوكول خاص باش يكون المرور آمن فمضيق هرمز، بالإضافة لرفع العقوبات الاقتصادية وإعادة إعمار لي تضرّر.

وكان ترامب قال البارح الاثنين فتصريح : “نقدر نمحي البلاد كاملة فليلة وحدة، ويمكن تكون هديك الليلة هي غدا”. وهدّد حتى بتدمير محطات الضو والبنية التحتية ديال إيران إلا ما قبلاتش بالشروط قبل نهاية المهلة.

وفنفس الوقت، دعا علي رضا رحيمي، نائب وزير الرياضة الإيراني، الفنانين والرياضيين باش يديرو سلاسل بشرية قدّام محطات الضو و البنية التحتية والقناطر  باش يحتجو على أي هجوم ممكن على البنية التحتية.

كما قال المتحدث  باسم مقر خاتم الأنبياء، إن ترامب “كيتوهم”، وأكد أن الإيرانيين غادي يوقفو كاملين  باش يحميو المنشآت الحيوية وزاد : “غدا الثلاث مع 2 ديال العشية، غادي نديرو يد فيد فسطاسيونات الضو فإيران كاملة والبنات التحتية ، مهما كانت معتقداتنا أو توجهاتنا، باش نقولو بلي ضرب البنية التحتية المدنية جريمة حرب”.