كود سبور//

كاين الدولي المغربي يحيى عطية الله فالمغرب حاليا، فالوقت اللي خرجو مسؤولين الفريق ديالو سوتشي الروسي كايقولو أنه غبر.

وكشفت مصادر مطلعة، أن الدولي المغربي يحيى عطية الله كاين فالمغرب وجا له الاحد للي فات، وكاين دابا بالضبط فمدينة آسفي، كايبريباري فيها، قبل ما يحسم المستقبل ديالو واش غايبقى مع فريق سوتشي الروسي اللي مفروض عليه ينقص من عدد اللاعبين الأجانب اللي عندو فالفريق حيث نزل إلى القسم الثاني من البطولة الروسية، أو أنه يمشي لفريق آخر إعارة أو بصفة نهائية.

ووضحت نفس المصادر، أن يحيى عطية الله كايناقش مع وكيل الأعمال ديالو العروض اللي تقدمت له، وحسب نفس المصدر فاللاعب عندو عرض من فريق بيرسبوليس الإيراني، وفريق آخر روسي.