گود سبور//

مشى المغربي الأصل والهولندي الجنسية أنور الغازي يلعب فقطر، بعد جدل كبير رافق الكاريير ديالو فالعامين اللي فاتو والمشاكل اللي كانت وقعت له مع الفريق ديالو السابق ماينز الألماني بسبب تضامن اللاعب المذكور مع الفلسطينيين فحربهم ضد إسرائيل.

وأعلن نادي السيلية القطري اليوم الاربعاء عن تعاقد الفريق مع أنور الغازي، جاي لعندهم من فريق كارديف سيتي فريق ويلز المنافس فالبطولة ديال النگليز، وسناو القطريين مع المهاجم المغربي-الهولندي عقد المدة ديالو عامين غايلعبها معهم.

وكان أنور الغازي اتخذ قرار التبرع بمبلغ مهم من المستحقات المالية ديالو اللي خداها من فريق ماينز الألماني بعدما ربحهم قانونيا فألمانيا، بسبب أنهم تفارقو معه من طرف واحد بعدما عبر على التضامن ديالو مع الفلسطينيين ديال غزة فحربهم مع إسرائيل، وقرر التبرع بـ500 ألف أورو لتمويل مشاريع للأطفال بقطاع غزة.

للإشارة فأنور الغازي حتى هو من اللاعبين اللي ندمو حيث ما اختاروش المنتخب المغربي ولعبو مع منتخبات بلدان المهجر بعدما كان لعب مع المنتخب الهولندي، وهذا الشي ما منعش عدد كبير من المغاربة يتعاطفو معه ملي وقفوه ماينز الألماني وتفارقو معه من طرف واحد حيث حط شي بوسطات على مواقع التواصل الاجتماعي كايتضامن مع فلسطينيين غزة ضد اسرائيل.