أميمة عطية – كود كازا ///

رجعات، لبارح الأربعاء 19 غشت ، الرحلات الجوية المباشرة بين تل أبيب ومراكش للخدمة من جديد، من بعد بلوكاج دام 3 سنين، بعدما هبطات أول رحلة تابعة لشركة الطيران الإسرائيلية “أركيع” بمطار مراكش المنارة، ووصلات وزيرة المواصلات الإسرائيلية ميري ريغيف للمغرب باش تشم ريحة البلاد.

ريغيف، اللي عندها أصول مغربية، اختارت تكون حاضرة فهاد الرحلة الأولى، بعدما كانت الرحلات المباشرة بين مطار بن غوريون ومطار مراكش المنارة توقفت بسبب الأوضاع الأمنية اللي عرفتها المنطقة من أكتوبر 2023.

فهاد السياق وفتصريح خاص ل “ كود” ، قال ياسر الوادي العلوي، النائب الأول والناطق الرسمي باسم جمعية موشي بنميمون للتراث اليهودي المغربي وثقافة السلام: إن رجوع الرحلات المباشرة بين تل أبيب ومراكش عندو أهمية اقتصادية وسياحية، وكيفتح آفاق جديدة للسفر والتبادل السياحي والاستثماري بين المدينتين.

ووضح الوادي العلوي أن مراكش، باعتبارها واحدة من أبرز الوجهات السياحية العالمية، عندها مؤهلات ثقافية وحضارية وفندقية كبيرة، وعودة الربط الجوي المباشر تقدر تساهم فتنشيط الحركة السياحية وتقوية حضور المدينة فالسوق الدولية.

وزاد ضاف المتحدث نفسو ، أن استئناف الرحلات يقدر يعاون شركات الطيران والاوطيلات ووكالات الأسفار، ويفتح فرص جديدة للتعاون الاقتصادي والاستثماري، وحتا فتبادل الثقافي والإنساني بين الشعوب.

وشدد الوادي العلوي ، على أن مراكش قادرا تكون «جسر للتواصل والانفتاح»، وتخلي المغرب ينفتح على العالم .

وللإشارة فقط، ريغيف جات للمغرب فـ “زيارة خاصة” مرفوقة بوفد، ومن المنتظر يبقاو حتى الاثنين 24 غشت، وهاد الزيارة هي الثالثة ليها للمغرب فالولاية الحكومية الحالية، خصوصا أن باها تزاد فالمغرب.