وكالات//

شدّات السلطات الميريكانية نجم اليوتيوب كودي ديتويلر، صاحب قناة WhistlinDiesel  اللي كيتابعوها أكثر من 10 مليون شخص، بتهمة التهرب الضريبي بعدما شعل العافية فسيارتو الفاخرة من نوع فيراري F8 تريبوتو موديل 2020، واللي كيتقال أنه دار هاد الشي باش يصوّر محتوى لقناتو.

وحسب وثائق المحكمة، توجهات للشاب اللي عندو 27 عام تهمة “التهرب المتعمد وغير القانوني” من دفع الضرائب اللي كيسالها لولاية تينيسي، بمبلغ كيتجاوز 500 دولار. وكشف ديتويلر فوسائل التواصل الاجتماعي أنه ما شرح ليه حتى شي واحد السبب الحقيقي للاعتقال، ونشر صور وفيديوهات كيبان فيهم وهو مربوط من طرف البوليس أثناء التوقيف.

وأشار كودي أنه قضا عدة ساعات فالحبس قبل ما يطلقو سراحو بكفالة، وأكد أنه خلص الضرائب ديالو كاملين من قبل، ولكن ما توصل حتى بشي إشعار رسمي قبل الاعتقال. وإذا تبثت عليه تهمة التهرب الضريبي من الفئة “هـ”، يقدر يواجه حتى ست سنوات ديال الحبس وغرامة ديال 3000 دولار.