كود سبور//

حسم الألماني جوزيف زينباو الوجهة ديالو، المدرب السابق للرجاء الرياضي، بعدما كان قريب يرجع يدرب فالبطولة الاحترافية، وقرر يمشي يخدم فالجزائر.

ووقع جوزيف زينباور مع فريق شبيبة القبائل، اليوم الاثنين فالعشية باش يدرب الفريق المنتمي إلى منطقة القبايل والممارس بالبطولة الجزائرية.

وكان جوزيف زينباور دار سمية الموسم الماضي ملي ربح الثنائية التاريخية ديال البطولة الاحترافية وكأس العرش مع الرجاء الرياضي بدون خسارة، قبل ما يخوي بالفريق فالصيف ويتراجع على الاستمرار معه وخلاهم كايتسناوه وهو گالس يتفاوض مع فرق الخليج، وهرس الشرط الجزائي ومشى يدرب الوحدة السعودي، اللي عطها معهم غير للخسران وهما يجريو عليه، مع العلم أنه كان فراس مالو لقب واحد قبل ما يدرب الرجا، هو كأس جنوب إفريقيا مع أورلاندو بيراتس الجنوب إفريقي.