كود سبور//

رجع كل من طارق السكتيوي مدرب المنتخب الوطني المغربي لكرة القدم لأقل من 23 عام، ونبيل باها مدرب المنتخب الوطني المغربي لأقل من 17 عام، من العاصمة القطرية الدولية إلى الدار البيضاء، اليوم الثلاثاء على متن طيارة تابعة للخطوط الملكية المغربية، بعدما حضرو الاحد الماضي قرعة كأس العرب وقرعة مونديال U17 فقطر.

وحسب ما عاين جورنال “گود”، فطارق السكتيوي رجع هو ونبيل باها فنفس الطيارة، ولكن الغريب في الأمر هو أنهم رجعو مفرقين، حيث طارق السكتيوي رجع ف درجة البيزنيس كلاس فالطيارة اللي قلعت من مطار الدوحة مع 1 وربع ديال صباح اليوم الثلاثاء، ووصلت إلى مطار محمد الخامس مع 8 الصباح، أما نبيل باها رجع فالدرجة الثانية ديال نفس الطيارة.

هذا القضية ديال مدرب المنتخب المغربي لأقل من 23 عام يركب البيزنيس كلاس ومدرب المنتخب المغربي لأقل من 17 عام يركب الدرجة الاقتصادية ديال نفس الطيارة، تطرح علامات استفهام كبيرة على شنو أسباب هذا الشي، وواش كاين شي فرق بين المدربين، خصوصا وأن الجامعة الملكية المغربية عندها كل الأطر الوطنية اللي خدامين مع المنتخبات الوطنية فگاع الفئات السنية بحال بحال، ومن الفوق فالمدربين بجوج حققو إنجازات بقيمة كبيرة سوى السكتيوي اللي ربح برونزية أولمبياد باريس 2024، أو نبيل باها اللي ربح مؤخرا كأس إفريقيا لأقل من 17 وتأهل مع الأشبال للمونديال.