كود كازا//
غريب أمر هاد السياسيين الفاسدين فالمغرب. لما تكون كتحكم وكتسير المال العام وكدير الصفقات وتحضى بمكانة خاصة فالمجتمع حيث انت رئيس مجلس اقليمي وعضو قيادي في حزب سياسي هاديك الساعة كيكون المغرب زوين والمسؤولين ديالو زوينين….
ولكن لما تخرج السطر ويطبق عليك القانون بحالك بحال المواطنين كيولي المغرب ما مزيانش وفيه الظلم. هذا بالضبط ما وقع مع عبد الواحد خلوقي، رئيس المجلس الإقليمي السابق لسيدي سليمان وعضو المكتب السياسي لحزب الاتحاد الدستوري اللي رفضت، مؤخرا، محكمة النقض طلب إعادة النظر لي تقدم بيه خلوقي في مواجهة حكم العشر سنوات لي تحكم بيها من طرف محكمة الاستئناف بالقنيطرة.
مصادر مطلعة أكدت ل “كود” أن خلوقي جهز الملف ديالو من أجل طلب اللجوء السياسي في فرنسا بدعوى أنه تعرض للظلم في الحكم ديالو..متهما أطرافا في الدولة بالوقوف وراء محاكمته.
خلوقي، بالإضافة إلى حكم عشر سنين النافذة، كتسناه محاكمة أخرى، رفقة شقيقه عبد الرحيم خلوقي، المتهم هو أيضا في عصابة الاورو في ملف جديد. وهو نفس الملف الذي أصدرت فيه محكمة الاستئناف بالقنيطرة حكما ضد كريم الفهيم بالسجن عشر سنوات سجنا نافذة.
