الوالي الزاز -كود- العيون///

[email protected]

استقبلات الخارجية الجزائرية المديرة التنفيذية المساعدة ديال برنامج الأغذية العالمي World Food Programme، فاليري نيوسم گارنييري، اللي كدير زيارة رسمية للجزائر فالفترة مابين 13 و16 ماي.

واجتامع الأمين العام لوزارة الشؤون الخارجية الجزائرية، لوناس مقرمان مع فاليري نيوسم گارنييري، المديرة التنفيذية المساعدة لبرنامج الأغذية العالمي World Food Programme ، اللي كانت مرفوقة بكولين فليشر شنايدر المديرة الإقليمية WFP MENA لبرنامج الأغذية العالمي الشرق الأوسط وشمال أفريقيا.

وبحث الجانبان الدور اللي كيديرو برنامج الأغذية العالمي فالعالم وعلى مستوى منطقة الشرق الأوسط وشمال أفريقيا، بحيث خصصوا محادثاتهم لتبادل وجهات النظر حول وضع ساكنة مخيمات تندوف على ضوء النقص الحاصل فالغذاء وعدم وفاء الدول المانحة بالالتزامات اتجاههم، الشي اللي خلى الوضع يزيد يتدهور.

الزيارة والمحادثات كتجي فوقت تخلات فيه الجزائر عن ساكنة مخيمات تندوف، بحيث انعادمات المساعدات ديالها هاد العام، لاسيما فشهر رمضان اللي ما رسلات ليهم فيه تا حاجة، وكتحاول ما أمكن تزيد تأزم الوضع فمخيمات تندوف بهدف أنها تلفت انتباه الأمم المتحدة والمنظمات الدولية لصعوبة الوضع، خاصة وأنها لم تحقق شيئا فالمسار السياسي ديال النزاع.