گود سبور//

رحلة طويلة كاتسنى الوداد الرياضي إلى زنجبار التنزانية باش يلعبو ضد فريق عزام التنزاني، ضمن منافسات كاس الكونفيدرالية الإفريقية.

وغايسافرو الوداد الرياضي من الدار البيضاء إلى زنجبار فـ رحلة جوية عادية ماشي مباشرة، مرورا بالعاصمة القطرية الدوحة اللي غاديين يديرو فيها ليسكال، وما غاديش يمشيو فـ طياراة خاصة، والانطلاقة غاتكون غدا الثلاثاء وغايوصلو الاربعاء الجاي فـ العشية، ومن المنتظر يديرو حصة تدريبية فـ نفس اليوم اللي غايوصلو فيه باش يحيدو عيا السفر، والغد له الخميس يديرو آخر حصة تدريبية قبل الماتش، اللي ملعوب يوم الجمعة فـ تيران أمان بزنجبار ضد فريق عزام، ويرجعو بحالهم.

وقدرو الوداد الرياضي يبداو مزيان دور مجموعات كاس الكونفيدرالية الإفريقية، برباح مهم على فريق نيروبي الكيني البارح الأحد فـ تيران العربي الزاولي بالدار البيضاء بنتيجة 3-0، برسم الجولة الأولى من الگروبات، ومتصدرين المجموعة الثانية مع مانييما من الكونگو الديمقراطية برصيد 3 نقاط لكل فريق، مقابل صفر نقطة لعزام ونيروبي.