كود سبور//

صبح المهدي أمزان سادس مغربي كيتمكن من صعود أعلى قمة فالعالم “جبل إيفرست” اللي الارتفاع ديالو 8848 متر فوق سطح البحر..

وكشف الصديق ديالو وسيل محمد يونس اللي حتى هو متخصص فصعود المرتفعات والقمم الجبلية، فتصريح لموقع “گود”، أن مهدي أمزان تعذب بزاف باش يحقق هذا الإنجاز، وفالنزول من القمة كان فقد القدرة على الرؤية، وكيعاني من آلام كبيرة فعينيه.

وأكد وسيل محمد يونس، لـ”كود” أن البطل مهدي أمزان كيعاني على مستوى العين ديالو ويقدر يمشي له الشوف إذا بقى نازل على رجليه، ولكن هو باغي يحقق هذا الإنجاز للمغرب، حيث احتساب صعود قمة إيفيريست كيكون بالصعود والنزول من القمة على الرجلين وماشي بالصعود فقط والنزول بالهيليكوبتر، وهو باغي يهبط على رجليه ورافض تماما الإجلاء ديالو بالهيليكوبتير ومازال كيقاوم الثلوج ودابا وإلى حدود كتابة هاد الأسطر وصل وهو نازل إلى ارتفاع 3600 متر فوق سطح البحر.

وطلب وسيل محمد يونس من الجهات المختصة فالمغرب، التدخل باش متسلق الجبال المهدي أمزان، يتلقى الإسعافات والعناية الطبية اللازمة ملي يرجع للمغرب، وأنه يكون اهتمام في الجبال والمرتفعات بالمغاربة اللي كيحققو إنجازات تاريخيّة ولكن كيعانيو فالسكات من التهميش وغياب الدعم.